ایک طرف سے دنیا بھر میں اربوں افراد غربت کی لکیر سے نیچے ہونے کے باعث پیٹ بھرے بغیر سونے پر مجبور ہو چکے ہیں تو دوسری طرف کروڑوں لوگوں کے کھانوں کے برابر خوراک ایک دن میں ضائع کر دی جاتی ہے۔
اقوام متحدہ کی طرف سے فوڈ ویسٹ انڈیکس رپورٹ جاری کر دی گئی ہے جس کے مطابق دنیا کی ایک تہائی آبادی غذائی عدم تحفظ کا شکار ہو چکی ہے اور دنیا بھر میں روزانہ کروڑوں لوگوں کے کھانوں کے برابر خواک صرف ایک دن میں ضائع کر دی جاتی ہے۔
فوڈ ویسٹ انڈیکس رپورٹ میں انکشاف ہوا ہے کہ دنیا بھر میں 2022ء میں 1 ارب کھانوں کے برابر خوراک کو صرف ایک دن میں پھینک کر ضائع کر دیا گیا۔ خوراک کا ضیاع زیادہ تر ان خاندانوں کی طرف سے کیا گیا جو 60 فیصد کے قریب ہے جبکہ کینٹین، ہوٹلوں اور ریسٹورنٹس میں 28 فیصد، قصاب اور گروسری وغیرہ نے 12 فیصد خوراک ضائع کرنے میں اپنا حصہ ڈالا۔
بین الاقوامی ادارے کی طرف سے خوراک کے اس ضیاع کا عالمی المیہ قرار دیتے ہوئے رپورٹ میں کہا گیا ہے کہ 1 ٹریلین ڈالر سے زیادہ قیمت کا کھانا کاروباری اداروں اور گھروں میں ایک ایسے وقت میں پھینک کر ضائع کر دیا گیا جب تقریباً 800 ملین کے قریب لوگ بھوک سے مر رہے تھے۔
رپورٹ کے مطابق دنیا کا ہر شخص سالانہ اوسطاً 79 کلوگرام کے قریب خوراک ضائع کر دیتا ہے جس سے دنیا بھر میں بھوک سے متاثر ہونے والے ہر شخص کو 1.3 کھانا دیا جا سکتا ہے۔ رپورٹ میں خوراک ضائع کرنے سے روکنے کی کوششوں کو بہتر کرنے اور شہروں میں ضائع کی جانے والی خوراک کو بطور کھاد استعمال بڑھانے کی سفارشات دی گئی ہیں۔
