اسلام آباد ہائیکورٹ کے حکم پر بیلف نے آئی نائن تھانے سے 6 کروڑ تاوان کیلئے اغوا شخص کو بازیاب کروا لیا ہے۔ تفصیلات کے مطابق اسلام آباد ہائیکورٹ میں محمد اویس پراچہ کی جانب سے انڈسٹریل ایریا آئی نائن اسلام آباد کے ایس ایچ او ودیگر کے خلاف مغوی کے بیٹے کی طرف سے درخواست دی گئی
جس میں کہا گیا کہ انڈسٹریل ایریا آئی نائن کے ایس ایچ او نے غیرقانونی طور پر اس کے والد نعیم پراچہ کو 6 کروڑ روپے تاوان کے لیے اغوا کر لیا ہے جس پر عدالت نے بیلف کو مغوی کو بازیاب کروانے کا حکم دیا جس کے بعد اسلام آباد ہائیکورٹ کے حکم پر بیلف نے انڈسٹریل ایریا آئی نائن اسلام آباد تھانے پر چھاپہ مارا جس میں 6 کروڑ تاوان کیلئے اغوا کیا گیا شخص نعیم پراچہ بازیاب کرا لیا گیا۔
سینئر صحافی و سابق صدر نیشنل پریس کلب شکیل قادر نے اس حوالے سے سماجی رابطوں کی ویب سائٹ ٹویٹر پر خبر دیتے ہوئے اپنے پیغام میں لکھا کہ: اسلام آباد پولیس کی جانب سے شہریوں کو غیر قانونی حراست میں رکھ کر کروڑوں روپے تاوان کا مطالبہ کرنے کا انکشاف!
ہائیکورٹ کے حکم پر بیلف کا تھانے آئی نائن پر چھاپہ مغوی نعیم پراچہ بازیاب، چھ کروڑ تاوان مانگا گیا! درخواست گزار ، ایس ایچ او معطل !
ایک ٹویٹر صاف نے لکھا کہ یہ کوئی غیر معمولی بات نہیں، اسکی مزید تحقیق ہونی چاہئے، اگر سچ ہے تو ایک انتہائی افسوسناک بات ہے۔ جس پر ردعمل دیتے ہوئے سینئر صحافی شکیل قادر نے اپنے ٹویٹر پیغام میں لکھا کہ: یہ حقیقت ہے اور ہائیکورٹ نے ڈائریکٹر ایف آئی اے کو انکوائری کرکے دس دن میں رپورٹ مانگی ہے!
اسلام آباد ہائیکورٹ نے انسپکٹر جنرل آف پولیس کو ہدایت دیتے ہوئے کہا کہ ایس ایچ او انڈسٹریل ایریا آئی نائن تھانے کو فوری طور پر معطل کر کے نیا ایس ایچ او تعینات کیا جائے اور اس کی معطلی کا آرڈر کل صبح تک کورٹ میں پیش کیا جائے۔ ڈائریکٹر فیڈرل انویسٹی گیشن ایجنسی کو انکوائری کر کے رپورٹ 10 دن میں پیش کرنے کی ہدایت بھی دی گئی ہے۔