سابق امریکی صدر ڈونلڈ ٹرمپ نے کہا ہے کہ ایران اور اسرائیل کے درمیان جلد امن معاہدہ ہو سکتا ہے، دونوں ممالک کو معاہدہ کرنا چاہیے تاکہ مشرق وسطیٰ میں استحکام آئے۔ ٹرمپ نے یہ بات اپنے سوشل میڈیا پلیٹ فارم ٹروتھ سوشل پر ایک بیان میں کہی۔
ٹرمپ کے مطابق ایران اور اسرائیل کے درمیان "بہت سی ملاقاتیں اور فون کالز" ہو رہی ہیں، اور وہ پُرامید ہیں کہ دونوں فریق معاہدے پر پہنچ جائیں گے۔ انہوں نے اپنی صدارتی مدت کے دوران کیے گئے مبینہ عالمی معاہدوں کا حوالہ دیتے ہوئے کہا کہ "یہ ویسا ہی معاہدہ ہوگا جیسا میں نے بھارت اور پاکستان کے درمیان کرایا تھا۔"
انہوں نے کہا کہ اُس وقت انہوں نے پاکستان اور بھارت دونوں کے رہنماؤں سے بات کی، انہیں امریکہ کے ساتھ تجارت کی پیشکش کی، اور دونوں لیڈرز نے فوری فیصلہ کیا جس سے کشیدگی کم ہو گئی۔
ٹرمپ نے شکوہ کرتے ہوئے کہا کہ "میں بہت کچھ کرتا ہوں، مگر مجھے کبھی کسی چیز کا کریڈٹ نہیں ملتا، لیکن کوئی بات نہیں، عوام سب کچھ سمجھتے ہیں۔"
انہوں نے اپنی صدارت کے دوران سربیا اور کوسووو، اور مصر اور ایتھوپیا کے درمیان ہونے والے معاہدوں کا بھی ذکر کیا۔
اپنے بیان کے اختتام پر انہوں نے کہا:
"مشرق وسطیٰ کو پھر سے عظیم بناؤ!" — جو اُن کے سیاسی نعرے "Make America Great Again" کا ایک علاقائی انداز ہے۔
