اپنی نااہلی کا ملبہ عوام کے سر ڈالنا ن لیگی حکومت کا وطیرہ رہا، بجلی چوری اور اربوں روپے کے واجبات کا بوجھ عوام کے سر تھوپنے کی کوشش نیپرا نے ناکام بنا دی، چیئرمین نیپرا طارق سدوزئی نے سابقہ حکمرانوں کی عوام دوستی کا بھانڈا پھوڑ دیا۔
جرم چاہے کسی کا ہو مگر سزا عوام کو دو، ن لیگ کے 5 سالہ دور حکومت میں یہی اصول ٹھہرا۔ عوام دوستی کے دعوے داروں نے بجلی چوری اور اربوں روپے کے واجبات باقاعدگی سے بل ادا کرنے والے صارفین سے وصول کرنے پر زور دیا مگر بھلا ہو نیپرا کا جس نے غیرقانونی احکامات ماننے سے صاف انکار کردیا۔
سینیٹ کی قائمہ کمیٹی برائے کیبنٹ ڈویژن کے اجلاس میں چیئرمین نیپرا طارق سدوزئی نے سابقہ حکمرانوں کی اس عجیب منطق کو مسترد کرنے کی وجہ بھی بتادی۔
چیئرمین نیپرا کہتے ہیں ہمیں قانون اجازت نہیں دیتا کہ آپ بل نہیں دے رہے اور آپ کے بل کا بوجھ اس پر ہو جو بل دے رہا ہے، اس مسئلے کا حل نہیں ہے، آپ اپنے آپ کو ٹھیک کریں، سو فیصد بل وصول کریں اور چوری کو ختم کریں۔
چیئرمین نیپرا نے مزید بتایا کہ عوام سے سالانہ 226 ارب روپے کیپسٹی چارجز کی مد میں وصول کئے جاتے ہیں، ناقص ترسیلی نظام کے باعث اس خطیر رقم سے پیدا ہونے والی بجلی صارفین تک نہیں پہنچ پاتی۔
https://www.samaa.tv/urdu/pakistan/2018/10/1309392/
