روسی دارالحکومت ماسکو میں ہیکرز نے آن لائن ٹیکسی سروسز کی مدد سے پورے شہر کی ٹریفک جام کردی ہے۔
بین الاقوامی میڈیا رپورٹس کے مطابق ماسکو میں ہیکرز آن لائن ٹیکسی سروس یانڈیکس کی مدد سے پورےشہر کی ٹریفک جام کرنے میں کامیاب ہوگئے ہیں۔
رپورٹ کے مطابق یہ واقعہ یکم ستمبر کو اس وقت پیش آیا جب ہیکرز نے آن لائن ٹیکسی سروسز کی ایپلیکیشن ہیک کرکے تمام ٹیکسیوں کو ایک ہی وقت میں ماسکو کی ایک مصروف ترین مرکزی شاہراہ پر طلب کرلیا۔
واقعہ کی ویڈیو سوشل میڈیا پر وائرل ہوگئی ہےجس میں دیکھا جاسکتا ہے کہ سینکڑوں کی تعدادمیں ٹیکسیاں شاہراہ پر جمع تھیں جس کی وجہ سے سڑک پر گاڑیوں کی لمبی قطاریں لگ گئیں ، "نامعلوم" نامی ہیکرز گروپ نے اس کی ذمہ داری قبول کرلی ہے۔
آن لائن ٹیکسی سروس کی جانب سے واقعہ سے متعلق جاری کردہ بیان میں کہا گیا ہے کہ ہیکرز نے سروس کے سرور پر حملہ کرنے کی کوشش کرتے ہوئے درجنوں گاڑیوں کو ایک ہی جگہ پہنچنے کا ٹاسک دیدیا، جس کے نتیجے میں ہونے والا ٹریفک جام تقریبا 40 منٹ تک برقرار رہا۔
آن لائن ٹیکسی سروس کے مطابق مستقبل میں ایسے کسی بھی واقعہ سےبچنے کیلئے کمپنی ایپلیکیشن اور سرور کی سیکیورٹی بہتر بناتے ہوئے الگورتھم کو بہتربنایا جارہا ہے۔
واضح رہے کہ ماسکو بدترین ٹریفک کے اعتبار سے دنیا کا دوسرا بدترین ملک ہے،یہاں ٹریفک جام ہونا ایک معمول کی بات ہے، تاہم ٹیکسیوں کی وجہ سے ٹریفک جام کا واقعہ پہلی بار سامنے آیا ہے۔
