پنجاب کے شہر پتوکی میں شادی ہال میں پاپڑ بیچنے والا مزدور باراتیوں کے تشدد سے جاں بحق ہوگیا۔پاپڑبیچنے والے پر باراتی کی جیب کاٹنے کا الزام تھا۔
تفصیلات کے مطابق پتوکی کے شادی ہال میں باراتیوں نے پاپڑ بیچنے والے مزدور کو تشدد کا نشانہ بنا کر مار ڈالا اور بے حسی کا عالم یہ کہ غریب شخص کی لاش شادی ہال میں پڑی رہی اور لوگ بے حس ہوکر مزیدار کھانے اڑاتے رہے جس کی ویڈیو سوشل میڈیا پر وائرل ہوگئی۔
وائرل ہونیوالی ویڈیو میں دیکھا جاسکتا ہے کہ مزدور کی لاش شادی ہال میں پڑی ہوئی ہے اور لوگ کھانا کھانے میں مصروف ہیں۔انسانی جان کی قیمت کا اندازہ اس فوٹیج سے لگایا جاسکتا ہے۔
اشرف پاپڑ والا پاپڑ بیچ کر اپنے بچوں کا پیٹ پالتا تھا۔ اسکی غلطی یہ تھی کہ وہ شادی میں لوگوں کی کثیر تعداد دیکھ کر شادی ہال میں گھس گیا، جہاں باراتیوں نے اسے جیب کترا سمجھا اور تشدد کرکے مارڈالا۔
پولیس کا کہنا ہے کہ شادی میں آئے افراد نے مزدور اشرف سلطان پر جیب کاٹنے کے الزام میں تشدد کیا،پولیس نے مقتول کی لاش کو ضابطے کی کارروائی کے لیے اسپتال منتقل کردیا۔
پولیس کا کہنا ہے کہ شادی ہال کے منیجر کو حراست میں لے لیا گیا ہے، واقعے کی مزید تفتیش جاری ہے اور ذمہ داران کا تعین کیا جارہا ہے۔
آئی جی پنجاب نے واقعے کا نوٹس لیتے ہوئے آر پی او شیخوپورہ سے رپورٹ طلب کرلی اور ڈی پی او قصور کو ملزمان کو جلد گرفتار کرنے کا حکم دے دیا، ان کا کہنا تھا کہ ملوث افراد کو گرفتار کرکے قرار واقعی سزا دلوائی جائے۔
وزیراعلیٰ پنجاب عثمان بزدار نے واقعے کا نوٹس لیتے ہوئے آئی جی پنجاب سے رپورٹ طلب کرلی۔
عثمان بزدار نے کہا کہ ملزمان کو جلد قانون کی گرفت میں لایا جائے، ملزمان کسی رعایت کے مستحق نہیں ہیں، جاں بحق نوجوان کے لواحقین کو انصاف کی فراہمی یقینی بنائی جائے۔
