فٹبال فینز کے لئے خوشخبری، فیفا کی نامزد نارملائزیشن کمیٹی اور حکومت کے مذاکرات کامیاب ہوگئے ہیں،فیفا کی جانب سے پاکستان پر عائد پابندیاں ہٹائے جانے کا امکان ہے، اے آر وائی نیوز کے مطابق پاکستان فٹ بال فیڈریشن میں اختلافات ختم ہوگئے ہیں۔
فیفا کی نامزد نارملائزیشن کمیٹی اور حکومت کے درمیان مذاکرات کامیاب ہونے پر فٹبال ہیڈکوارٹرز نارملائزیشن کمیٹی کے سپرد کردیا گیا،چیئرمین نارملائز یشن کمیٹی ہارون ملک نے تنازعہ ختم ہونے پر خوشی کا اظہار کیا اور کہا کہ پاکستان فٹبال کا بہتر دور شروع ہورہاہے،سارے معاملےمیں صبر وتحمل اور معاونت پر فیفا کےشکرگزار ہیں اب عالمی ایونٹس میں پاکستانی ٹیموں کی شرکت کو ممکن بنائیں گے۔
گذشتہ سال مارچ میں پاکستان فٹ بال فیڈریشن کے شفاف انتخابات کرانے کے لیے فیفا ہاؤس لاہور کا چارج نارملائزیشن کمیٹی کے حوالے کیا تھا،جس کئے بعد پاکستان فٹ بال فیڈریشن کے متنازع صدر اشفاق حسین گروپ نے زبردستی دفتر سے فیفا کمیٹی کو نکال کر تمام امور اپنے ہاتھ میں لے لیے تھے۔
انیس مارچ 2021 کو فیفا نے فیفا ہاؤس لاہور کو خط لکھ کر آگاہ کیا گیا تھا کہ وہ دفتر کا قبضہ فیفا نارملائزیشن کمیٹی کے حوالے کردیں ورنہ ان کی رکنیت منسوخ کر دی جائے گی،پاکستان فٹ بال فیڈریشن کے متنازع صدر اشفاق حسین نے حکم ماننے سے انکار کردیا تھا،اب وزیراعظم کی ہدایت پر مسائل حل کئے گئے ہیں۔
