Deene islam fil waaqe aik ruhaani taaqat hai kyunkeh yeh khudaa ki wahee ka naam hai. rooh bunyaadi tor per hawaa ko kehte hen magar is ka itlaaq wahee per bhi hota hai kyunkeh yeh insaanu ko mutaharak karti hai yani zindagi deti hai jaise hawaa insaanu aur deegar jaandaarun ko zindagi bakhshti hai.
albattaa is wahee ka kuchh maqsad hai jo aghraazo maqaasid ki soorat main kitaab main mojood hen. yahee wajah hai deene islam insaanu ko jeene ke liye kuchh maqaasid deta hai poora karne ke liye. issi liye ham kehte hen hamaari zindagi bemaqsad nahin hai. lihaaza insaanu ko un maqaasid ko haasil karne ke liye wahee ki gayee hai. taa keh log maqaasid ki taraf poori tarah se gaamzan hun un ke liye kuchh hadayaat bhi di gayee hen jo un ko sahee tareeqe se un maqaasid ko paane main madadgaar hun. yahee nahin wahee logoon ko diye ge maqaasid haasil karne ke liye baaqaaida program bhi deti hai taa keh aik tareeqaekaar ke teht woh ahdaaf haasil kiye jaa saken.
kyunkeh jo maqaasid diye ge hen woh kisi aik shakhs ke liye nahin hen balkeh poori insaaniyat ke liye hen lihaaza logoon ko aapas main miljul kar un ahdaaf ko haasil karna hai. is liye logoon ki jamaat jitni badi ho gi aur jitna ziyaada mehnat se saheeh tarah se kaam kare gi utna hi jald ahdaaf haasil kar le gi.
ab log jab ikathe hun ge un ko aik saheeh saalam jamaat banaane ke liye aik dastoor ki zaroorat ho gi aur qanoon ki bhi taa keh logoon ko saheeh tarah se munazzam kiya jaa sake aur un ko tasalsul diya jaa sake. yani logoon ne khud ko saheeh maanu main aik saheeh saalam ummat banaana ho ga issi liye quran main hidayaat di gayee hen jin ki madad se log dastooro qanoon banaa sakte hen. wajah yeh hai jo log ghair munazzam hun yani bikhre huwe hun woh koi kaam bhi khushasloobi se anjaam nahin de sakte.
hamaare nabi ne jo ummat tayaar ki thi logoon ki aik doosre ki madad se tayaar ki thi aur jab woh ummat tayaar ho gayee us ne woh kaam kar dikhaaya jo naamumkin nazar aata tha. aaj bhi musalmaanu ko wohee ummat banana ki zaroorat hai tab jaa kar woh woh kaam anjaam de saken ge jo un ko diya gayaa hai karne ko.
bebunyaad aqeede aur befaaida amaal se log na ummat ban sakte hen na koi karne waala kaam anjaam de sakte hen issi liye woh koi maqsad hi nahin rakhte aur yahee wajah hai firqa wariyat ki keh har koi apna apna alag alag giroh liye baitha hai apne apne zaati aghraazo maqaasid ke liye.
deene islam main firqa wariyat mumkin hi nahin hai. is liye keh jab logoon ke maqaasid aik hun woh sab mil kar quran aur haqaaiq ki roshni main dastooro qanoon banaayen to phir firqa wariyat ban kaise sakti hai? is liye keh aghraazo maqaasid, program, raahe amal, dastooro qanoon aur logoon main ahamahangi laazmi baat hai kisi bhi maqsad ko bhar laane ke liye. yahee baat yaani maqaasid aur hidayaat, dastooro qawaneen, raahe amal yaa tareeqaekaar aur logoon ki drustagi main ahamahangi un ke haq per hone ka saboot bhi hai.
jo ummat hamaare nabi ne tayaar ki thi us main yeh sab baaten mojood theen. woh ummat is liye tayaar ho saki kyunkeh woh aik baraadari thi drust maqaasid ki bunyaad per. aaj is ummat ke saamne islam sirf aik mazhab hai doosre mazaahib ki tarah deen nahin hai. logoon ko to yeh bhi maloom nahin hai deeno mazhab main farq kia hota hai.
in baatun se saaf zaahir hai musalmaanu ko deene islam per poori tarah kaarband hone aur rehne ki wajah se ghalba kaisa mila aur mile ga. hukamraanu, sarmaayadaarun aur mullaanu ke peechhe chal kar log hamesha zaleelo khawaar huwe hen. kyunkeh yeh log apni taaqat ka ghalat istemaal karte aaye hen khawaa woh taaqat in ko jathe se mile daakuwun ki tarah, maal se mile taajirun ki tarah yaa mazhab se mile mullaan ki tarah. isi ko badmaashi kehte hen aur quran main in sab baatun ka badaa tafseeli bayaan mojood hai magar in logoon ne apne bebunyaad tarjamun aur tafseerun se in batun ko chhupaa diya hai mazhabi zehniyat de kar.
logoon ko chahiye woh quran ko aqlo fikar yani haqaaiq ki roshni main padhen taa keh un ko maloom ho quran main asal paighaam kiya hai khudaa ka insaanu ke liye.
See
HERE and
HERE.