bunyaadi baat ye hai keh khudaa aur insaan dono ki baaten apni apni jaga aham hoti hen warna insaan kuchh bhi soch samajh hi nahin sakta. agar ho sake to meri is baat per zaroor ghoro fiker kijiye.
insaani ilm hota hi us ki zindagi ke tajarbaat per mabni hai ya phir jo us ko sikhaaya gayaa ho. her tajarba ya sikhayee gayee baat taareekh hi hoti hai is liye ke woh guzre lamhaat per mabni hoti hai.
issi liye ahaadith ka mukammal tor per inkaar aik ghalat nazriya hai. albatta ye baat bhi pakke tor per saabit hai aur saabit ki jaa sakti hai keh sab ki sab riwayaat ka drust hona laazmi nahin hai.
kuchh log samajhte hen islam sirf aik mazhab hai. kuchh log samajhte hen islam deeno mazhab hai aur kuchh samajhte hen islam sirf aur sirf aik deen hai mazhab nahin hai. lihaaza her aik ke haan sirf wohee riwayaat drust mani jaati hen jo kisi ke nazriye ke mutaabiq hun aur baaqi riwayaat ko chhor diya jaata hai.
islam asal main kia hai yani mazhab hai ya deeno mazhab hai ya khaalisatan sirf aur sirf deen hi hai mazhab nahin ye baat sirf aur sirf quraan ko drust tor per samajhne ke baad hi pata chal sakti hai.
mere nazdeek islam mazhab ho hi nahin sakta. is liye keh islam toham parasti per mabni nahin hai jo ke sirf aur sirf maznab ka khaasa hai.. yahee wajah hai mazhab waale log her tarah ki toham parasti main mubtila milte hen keh un ka khudaa aur us khudaa ke kaam un ke apne dimaaghun ki pedawaar hai jin ka haqaaiq ke saath koi taaluq hi nahin hai.
islam ko deeno mazhab kehne waale log bhi bahot had tak toham parasti hi main mubtila hen. woh quraan is liye padhte hen ta keh apne apne bebunyaad aqeedun aur amaal ko quraan se saabit ker saken quran ke ilfaaz ke ghalat maani ke zariye. is ka pakka saboot in logoon ke arkaane islam ke liye ge ghalat maani hen jis ki wajah se in ka islam sirf aur sirf aik mazhab ban ker reh jaata hai kyunkeh ye log arkaan ko bunyaadi islam kehte hen aur phir un ke tarjamen arkaan ko sirf aur sirf mazhab banaa dete hen jin ka insaaniyat ki falaaho behbood ke saath kuchh bhi taaluq hi nahin hota. isse sirf aur sirf yahee maloom hota hai keh khudaa ko logoon ki apni chaaploosi ke siwaa kuchh bhi matlab hi nahin hai. yun ye log khudaa ko khud insaan se bhi koi ghatiya hasti banaa dete hen aur in ko is baat ka ehsaas tak nahin hota keh ye aakhir ker kia rahe hen khudaa ki zaat ke saath aur insaaniyat ke saath.
asal deene islam sirf aur sirf aik raasta hai khudaa ki taraf se insaanu ke liye jis per chal ker insaan khudaa ke maqsade takhleeq ko poora ker sakte hen. khudaa ka maqsade takhleeq insaanu ko is duniya main rehne ke liye aik behtareen insaani maashre ke liye naqsha dena tha jis ko khud insaanu ne hi amli jaama pehnaana tha. jo insaanu ne abhi tak nahin pehnaaya kyunkeh un ko abhi tak quraan ki saheeh taleem maloom nahin ho saki un ki apni ghaflatun aur kotahiyun ki wajah se. albatta koshish kerte kerte aik din quraan ki asal taleem insaanu tak mukammal tor per pohnch hi jaaye gi. us waqt woh khudaa ki hidayat ke mutaabiq aik behtareen insaani maashra tameer ker len ge. yun khudaa ka deen aik din insaani duniya per ghaalib aa jaaye ga khud insaanu ki apni hi koshishun se. baaz insaan khudaa ka deen laane ki koshish is liye karte hen kyunkeh un ko pakke tor per maloom ho chaka hai keh is duniya main insaani masaail ka behtareen hal asal deene islam main hi hai aur kisi tareeqe main nahin hai. asal deene islam kia? See
HERE.