وزیراعظم عمران خان نے کہا ہے کہ ہم نے 90 روز میں ملک سے کرپشن کے خاتمے سے متعلق اپنا وعدہ پورا کردیا تھا۔
خبررساں ادارے کی رپورٹ کے مطابق وزیراعظم عمران خان کی زیر صدارت پارٹی و حکومتی ترجمانوں کا اہم اجلاس ہوا جس میں گزشتہ دنوں سامنے آنے والی ٹرانسپیرنسی انٹرنیشنل کی رپورٹ پر غور کیا گیا۔
اجلاس میں وفاقی وزیر اطلاعات و نشریات فواد چوہدری نے شرکاء کو اس رپورٹ پر بریفنگ دیتے ہوئے بتایا کہ ٹرانسپیرنسی انٹرنیشنل کی رپورٹ میں موجودہ حکومت کے دور میں مالی کرپشن کا کوئی بھی ذکر نہیں ہے، رپورٹ میں قانون کی حکمرانی سے متعلق معاملات کو اجاگر کیا گیا ہے۔
اس موقع پر وزیراعظم عمران خان کا کہنا تھا کہ ہم نے اقتدار میں آنے سے قبل ملک سے 90 روز میں کرپشن کے خاتمے کا وعدہ کیا تھا ہم نے یہ وعدہ 90 روز میں ہی پورا کردیا تھا۔
انہوں نے مزید کہا کہ موجودہ دور حکومت میں کوئی بھی مالی اسکینڈل سامنے نہیں آیا ، پچھلی حکومت میں پانامہ جیسا بڑے بڑے اسکینڈل سامنے آتے رہے ہیں۔
اجلاس میں مسلم لیگ ن کے صدر میاں شہباز شریف کے خلاف کرپشن کیسز کے معاملے پر بھی گفتگو ہوئی ، وزیراعظم عمران خان نے پارٹی و حکومتی ترجمانوں کو ہدایات جاری کیں کہ شہباز شریف کے خلاف کیسز سے متعلق عوام کومزید آگاہی دی جائے اور اس معاملے کو پبلک میں اجاگر کیا جائے۔
وزیراعظم نے کہا کہ لوگوں کو بتایا جائے کہ کس طرح شریف خاندان نے ملکی دولت کو لوٹا اور منی لانڈرنگ کرکے پیسہ بیرو ن ملک منتقل کرکے جائیدادیں بنائیں۔