پنجاب اسمبلی میں بلال یامین کا اپوزیشن رکن اعجاز شفیع پر گھڑی چوری الزام کا ڈراپ سین ہو گیا۔پنجاب اسمبلی میں گھڑی چوری کا الزام، معذرت کیساتھ واپس۔۔ مسلم لیگ ن کے رکن بلال یامین نے تحریک انصاف کے رکن اعجاز شفیع پر گھڑی چوری کا الزام لگانے پر معذرت کرلی
گزشتہ دنوں بجٹ پیش کرنے کے موقع پر ہنگامہ آرائی میں حکومتی رکن بلال یامین کی گھڑی گم ہو گئی، بلال یامین نے تحریک انصاف کے ایم پی اے اعجاز شفیع پر اپنی گھڑی چوری کرنے کا الزام عائد کیا
اس پر اسپیکر کی جانب سے کمیٹی بنائی گئی، بنائی جانے والی کمیٹی نے تحقیق کی اور سی سی ٹی وی فوٹیجز چیک کیں اور جس کے بعد بلال یامین کے الزام کوغلط قرار دے دیا۔
اس پر حکومتی رکن بلال یامین نے ایوان میں میاں اعجاز شفیع سے معذرت کر لی ہے اور کہا ہے کہ اسپیکر کی قائم کی گئی کمیٹی کی رپورٹ سے متفق ہوں، مجھے اس وقت یہ محسوس ہوا کہ اعجاز شفیع نے میری گھڑی اتاری ہے۔
بلال یامین نے کہا کہ میں نے دوستوں کے ہمراہ اس دن کی ویڈیو دیکھی، مجھے اعجاز شفیع کے خلاف ثبوت نہیں ملا۔اعجاز شفیع کی دل آزاری ہوئی ہے تو ان سے معذرت چاہتا ہوں۔
اس موقع پر اعجاز شفیع نے کہا کہ یہ طریقہ نہیں ہے، سپیکر صاحب آپ ان کی تربیت کریں، اپنی پارٹی کو خوش کرنے کے لیے گھٹیا الزام تراشی نہ کریں۔
سپیکر پنجاب اسمبلی ملک محمد احمد خان نے کہا کہ میرا خیال ہے اب معافی مانگ لی گئی ہے معاملہ ختم کیا جائے۔
اس پر بلال یامین نے کہا کہ یہ ذمہ داری ہاؤس کی ہے اور سپیکر صاحب آپ کی ہے کہ میری گھڑی ڈھونڈ کر دیں۔
قبل ازیں پنجاب اسمبلی اجلاس میں گھڑی چوری کے معاملے پر ایوان میں ہنگامہ آرائی شروع ہو گئی، حکومتی رکن آغا علی حیدر نے کہا کہ بانی پی ٹی آئی ہے ہی گھڑی چور۔
آغا علی حیدر کے الفاظ پر پی ٹی آئی اراکین نے شور شرابہ شروع کر دیا، حافظ فرحت عباس نے جواب میں کہا کہ آغا حیدر ننکانہ کا کھاد چور ہے۔
Last edited by a moderator:
