نومئی کے واقعات کے بعد ہم نے دیکھا کہ گاڑی کو مسلسل الٹے رخ یعنی ریورس گئیر چلایا جارہا ہے۔ڈرائیور جذیاتی ہے یا اناڑی ہے، یہ نہیں کہا جاسکتا۔
گاڑی کو ہمیشہ سیدھے رخ چلایا جاتا ہے، چاہے نارمل سپیڈ میں ، چاہے ہلکی یا تیز سپیڈ میں لیکن یہاں الٹی گنگا بہہ رہی ہے کہ گاڑی کو بجائے سیدھے چلانے کے الٹے یعنی ریورس گئیر میں چلایا جارہا ہے اور وہ بھی انتہائی تیز رفتاری سے اور ڈرائیور کو بھی پتہ نہیں چلتا کہ پیچھے کون ہے، کیا ہے۔۔ بس وہ اپنی مگن میں فل سپیڈ سے گاڑی چلاتا جارہا ہے اور پیچھے والی گاڑیاں ڈر کر دائیں بائیں ہورہی ہیں۔کچھ حادثات کا سب بن رہی ہیں اور گاڑی خود بھی کسی کی ٹکر سے تباہ ہورہی ہے۔
پاکستانی سیاست بھی آج کل ایسی ہی چل رہی ہے، کسی بھی لیڈر کی مقبولیت کم کرنے کیلئے عوام کو اس سے دور کیا جاتا ہے، ایسے اقدامات کئے جاتے ہیں کہ عوام اسکی بجائے کسی اور طرف راغب ہوں اور کسی پر الزام بھی نہ آئے۔
اگر کسی لیڈر کی مقبولیت کم ہوتی ہے تو پارٹی کے اہم رہنما، الیکٹیبلز، ٹکٹ ہولڈرز اور کارکن بھی اس لیڈر کی طرف دیکھتےہیں جو بہت مقبول ہو اور مقبولیت ختم ہونیوالے کا ساتھ چھوڑدیتے ہیں۔ پہلے کسی سے جماعت چھڑوانے کیلئے اس سے مقتدر حلقے یا جماعت رابطہ کرتی تھی، انہیں ترغیبات او ریقین دہانیاں کراتی تھی ۔
عمران خان 2011 میں بہت مقبول تھا ، الیکٹیبلز انکی طرف راغب تھے، دھڑا دھڑ شمولیتیں ہورہی تھی لیکن پھر وقت نے ایسا پلٹا کھایا کہ 2012 کے آخر میں وہی الیکٹیبلز جو تحریک انصاف میں شامل تھے ن لیگ میں جانا شروع ہوگئے، اسکی وجہ نوازشریف اور شہبازشریف کی سٹریٹجی تھی۔
عمران خان کو کاؤنٹرکرنے کیلئے انہوں نے پنجاب حکومت کا سہارا لیا، میٹروبس ، دانش سکولز، لیپ ٹاپس بانٹے ۔ میڈیا کو اپنے حق میں استعمال کیا، اسٹیبلشمنٹ بھی ن لیگ کیساتھ تھی لیکن ظاہر نہیں ہونے رہی تھی۔ اس وقت زبردستی تحریک انصاف چھڑوانے کی ضرورت ہی پیش نہیں آئی۔
لیکن اب صورتحال یہ ہے کہ بجائے عوام کو عمران خان سے متنفرکرنے کے عوام کو اپنےسے ہی متنفر کیا جارہا ہے، نومئی کے واقعے کو استعمال کرکے لوگوں سے زور زبردستی پارٹی چھڑوائی جارہی ہے اور وہ بھی بھونڈے انداز میں،کبھی پریس کانفرنس کرواکر، کبھی ٹاک شوز کرواکر اور کبھی کسی سیاسی جماعت کا دفتر استعمال کرے۔
پارٹی چھڑوانے کا انداز اس قدر بھونڈا ہے کہ جو بھی بندہ گرفتار ہوتا ہے یا اغوا ہوتا ہے کچھ دن بعد تحریک انصاف چھوڑکر گھر چلاجاتا ہے اور اس پر نہ صرف عمران خان کے حامی بلکہ مخالفین بھی مذاق اڑاتےہیں۔عوام جو مذاق اڑاتی ہے وہ الگ سے
اب تک تحریک انصاف سے بیشتر رہنماؤں سے پارٹی چھڑوائی جارہی ہے سب کا سکرپٹ ایک جیسا ہے یا معمولی ردوبدل کی جاتی ہے۔المیہ یہ ہے عثمان ڈار، صداقت عباسی، فرخ حبیب، عامرسلطان چیمہ جیسے بڑے سیاستدان تحریک انصاف چھوڑچکے ہیں جس کے بعد ن لیگ کے رہنماؤں کیلئے میدان خالی ہوتا جارہا ہے اسکے باوجود ن لیگ الیکشن سے گھبرارہی ہے اسکی وجہ کیا ہے؟
اسکی وجہ یہی ہے کہ گاڑی کو الٹا یا ریورس گئیر میں چلایا گیا ہے، بجائے روایتی طریقے سے پارٹی چھڑوانے کے زورزبردستی، اغوا، گرفتاری سے پارٹی چھڑوائی جارہی ہے جو الٹا عمران خان کی مقبولیت میں اضافے کا سبب بن رہی ہے۔
اسی وجہ سے تو بڑے بڑے تجزیہ کار کہہ رہےہیں کہ اگر الیکشن ہوں تو صنم جاوید مریم نواز کو، ڈاکٹریاسمین راشد نوازشریف اور عثمان ڈار کی والدہ خواجہ آصف کو ہرادے گی۔یہی وجہ ہے کہ سب کچھ کرنے کے بعد بھی ن لیگ اور کچھ مخصوص لوگ پریشان ہیں اور آئے دن نیا حربہ استعمال کرتے ہیں جو پہلے سے بھی بھونڈا ہوتا ہے۔
یہ گاڑی ریورس گئیر میں کب تک چلائی جائے گی؟ تب تک چلائی جائے گی جب تک منزل مقصود تک نہیں پہنچ جاتی لیکن یہ مشکل ہے کہ منزل مقصود تک پہنچے، اس سے پہلے ہی راستےمیں گاڑی خدانخواستہ کسی بڑے حادثے کا شکار ہوجائے گی اور اپنے ساتھ ساتھ کئی حادثات کا موجب بنے گی۔
اگر گاڑی منزل مقصود تک پہنچ بھی گئی تو یہ کھٹارا بن جائے گی جسے کوئی مکینک ٹھیک نہیں کرسکے گا اور پھر آخر میں کباڑئیے کو ہی 100 روپے کلو کے حساب سے بیچنا پڑے گی اور پھر کباڑیا اسے لوہے میں تبدیل کرکے لوہا پگھلا کر آگے بیچ دے گا۔
یہ گاڑی جسے کچلنا چاہتی ہے وہ جیل میں بیٹھا ہے، اسے کچلا تو نہیں جاسکے گا لیکن گاڑی کا اپنا ستیاناس ہوجائے گا۔
