وزیراعظم کے نمائندہ خصوصی برائے بین المذاہب ہم آہنگی علامہ طاہر اشرفی کا کہنا ہے کہ کم عمری کی شادی سے ماں اور بچے کی صحت کے مسائل پیدا ہوتے ہیں۔
نجی ٹی وی "جیو نیوز "کے مطابق علامہ طاہر اشرفی نے کہا اسلامی نظریاتی کونسل کم عمری کی شادی کی روک تھام پر کام کر رہی ہے۔ یہ بات انہوں نے کراچی میں کمسنی کی شادی اور صحت کے مسائل سے متعلق قومی مذاکرے سے خطاب کرتے ہوئے کہی۔
علامہ طاہر اشرفی نے تقریب سے خطاب میں کہا کم عمری کی شادی سے بچے اور ماں کی صحت پر بھی اثر پڑتا ہے، شادی کے حوالے سے اسلام نے بیٹیوں کو بھی حق دیا ہے، اسلام میں بھی عاقل اور بالغ کے لیے شادی کا ذکر ہے۔
انہوں نے کہا کہ بہت سے لوگ بضد رہتے ہے کہ خاندان سے باہر شادی نہیں کرنی، رسم و رواج اور روایات سے ہٹ کر بچوں کی شادی کرنی چاہیے، کزن سے بھی شادی ہوتو مرضی جاننے کیلئے اس کی بھی رائے لینا ضروری ہے۔
وزیراعظم کے نمائندہ خصوصی کا یہ بھی کہنا تھا کہ والدین پر ذمہ داری ہے کہ بچوں کو شادی کے حوالے آگاہی دیتے رہیں اور میڈیا پر بھی کم عمری کی شادی سے متعلق تقاریب ہونی چاہئیں۔
