روپے کے مقابلے میں ڈالر کی قیمت میں ایک بار پھر ہوشربا اضافہ۔۔ ڈالر کی قیمت تاریخ کی بلند ترین سطح پر ہے۔
تفصیلات کے مطابق آج پھر روپے کے مقابلے میں ڈالر کی قیمت میں ریکارڈ اضافہ دیکھنے میں آیا ہے۔ انٹربینک مارکیٹ میں ڈالر کی قیمت ایک روپے 81 پیسے اضافے سے تاریخ کی بلند ترین سطح پر پہنچ گئی۔
اسٹیٹ بنک کی جانب سے جاری کردہ اعدادوشمار کے مطابق کاروباری ہفتے کے آخری روز ایک روپے 81 پیسے اضافے سے 176 روپے میں فروخت ہوا۔ یاد رہے کہ 26 اکتوبر کو ڈالر 175 روپے 27 پیسے پر بند ہوا تھا۔
دوسری جانب اوپن مارکیٹ میں بھی ڈالر کی قیمت میں ایک روپے 50 پیسے کا اضافہ ہوا ہے جس کے بعد 178 روپے پر ٹریڈ ہوتا رہا۔
ڈالر کی قیمت میں اضافے سے جہاں پاکستان پر واجب الادا بیرونی قرضوں کی مالیت میں بھی اضافہ ہوا ہے وہیں مہنگائی کا ایک نیا طوفان آنے کا بھی خدشہ ہے۔
وزارت خزانہ کی جانب سے سینٹ میں پیش کی گئی اندرونی و بیرونی قرضوں کی رپورت کے مطابق جون 2018 میں ملک کے اندرونی قرضے 16.4 ٹریلین تھے، اگست 2021 تک اندرونی قرض 26 ہزار ارب روپے سے بڑھ گئے۔ رپورٹ کے مطابق 3 سال کے دوران بیرونی قرض میں ساڑھے 6 ہزار ارب روپے کا اضافہ ہوا ہے۔
معاشی ماہرین نے ڈالر کی قیمت میں مسلسل اضافے کے عمل کو تشویشناک قرار دیا ہے اور حکومت سے اپیل کی ہے کہ وہ غیر ضروری درآمدات پر پابندی لگائے، ڈالر کے ذخیرہ اندوزوں کے خلاف کاروائی کرے ورنہ مہنگائی کی نئی لہر سے نہ صرف عوام کی کمر ٹوٹ جائے گی بلکہ پاکستان کو سنگین معاشی نتائج بھگتنا پڑیں گے۔
دوسری جانب آج پاکستان سٹاک ایکسچینج میں بھی شدید مندی دیکھنے میں آئی ہے۔ آج کاروباری دن کے اختتام پر 100 انڈیکس میں 599 پوائنٹس کی کمی دیکھنے میں آئی ہے۔
جس کے بعد سٹاک مارکیٹ 46 ہزار کی حد بھی کھو بیٹھی ہے۔ کاروباری روز کے اختتام پر 599 پوائنٹس کمی کے بعد سٹاک مارکیٹ 45,749.15 پر پہنچ گئی ہے جبکہ سٹاک مارکیٹ کے شئیرز میں 1.29فیصد کمی دیکھنے میں آئی ہے۔
- Featured Thumbs
- https://www.siasat.pk/data/files/s3/dollar-pkr-psx-111.jpg
