قومی کرکٹر امام الحق نے سوشل میڈیا پر معنی خیز پیغام شیئر کیا ہے، جسے چیمپئنز ٹرافی کے لیے قومی ٹیم کے اعلان کے بعد ان کی ممکنہ ردعمل کے طور پر دیکھا جا رہا ہے۔
اپنی ٹوئٹ میں امام الحق نے لکھا کہ نتیجہ ان کی توقعات کے مطابق نہیں رہا، لیکن سفر ابھی ختم نہیں ہوا، یہی زندگی ہے۔ انہوں نے مزید کہا کہ ہر مشکل کے ساتھ آگے بڑھنا، خود کو مضبوط بنانا اور سب سے اہم صبر اور اللہ پر بھروسہ رکھنا ضروری ہے۔
امام الحق کو چیمپئنز ٹرافی کے ون ڈے اسکواڈ کے ممکنہ امیدواروں میں شمار کیا جا رہا تھا، تاہم انہیں 15 رکنی اسکواڈ میں شامل نہیں کیا گیا۔ اسکواڈ میں بیٹرز کے طور پر بابر اعظم، فخر زمان، کامران غلام، سعود شکیل اور طیب طاہر کو منتخب کیا گیا ہے، جب کہ آل راؤنڈرز میں فہیم اشرف، خوشدل شاہ اور نائب کپتان سلمان علی آغا کو شامل کیا گیا ہے۔
وکٹ کیپر بیٹرز میں محمد رضوان کو کپتان مقرر کیا گیا ہے جبکہ عثمان خان بھی اسکواڈ کا حصہ ہیں۔ بولنگ لائن میں اسپنر ابرار احمد کے ساتھ فاسٹ بولرز حارث رؤف، محمد حسنین، نسیم شاہ اور شاہین شاہ آفریدی کو جگہ دی گئی ہے۔
