لاہور ڈی ایچ میں کار حادثے کے ملزم افنان شفقت نے لاہور ہائی کورٹ سے رجوع کرلیا ہے۔
تفصیلات کے مطابق لاہور کے علاقے ڈی ایچ اے میں کار حادثے میں 6 افراد کی ہلاکت کے مقدمے میں کم عمر ملزم افنان شفقت نے لاہور ہائی کورٹ میں درخواست دائر کردی ہےجس میں نگراں وزیر اعلی پنجاب محسن نقوی، سی سی پی او لاہور سمیت دیگر افراد کو فریق بنایا گیا ہے اور موقف اپنایا گیا ہے کہ تمام فریقین کوعدالت میں طلب کیا جائے۔
درخواست گزار نے استدعا کی ہے کہ عدالت تحفظ فراہم کرے۔
خیال رہے کہ گزشتہ ہفتے اور اتوار کی درمیانی شب میں لاہور کے علاقے ڈی ایچ اے میں ایک کار حادثے میں ایک ہی خاندان کے 6 افراد جاں بحق ہوگئے تھے، تحقیقات کے دوران انکشاف ہوا کہ یہ حادثہ نہیں تھا بلکہ ایک دوسری گاڑی نے مقتولوں کی گاڑی کو ٹکر ماری تھی جس سے گاڑی کو حادثہ پیش آیا۔
تحقیقات کے دوران انکشاف ہوا کہ ٹکر مارنے والی گاڑی کم عمر افنان چلا رہے تھے اور ڈی ایچ اے وائی بلاک سے متاثرہ گاڑی میں بیٹھی خواتین کا پیچھا کررہا تھا، متاثرہ گاڑی کے ڈرائیور نے اسپیڈ بڑھا کر افنان سے دور جانے کی کوشش کی، افنان کی متاثرہ گاڑی کو ٹکر مارنے سے قبل اس گاڑی میں موجود افراد سے جھڑپ بھی ہوئی تھی۔
میکڈونلڈ چوک پر افنان نے 160 کلو میٹر فی گھنٹہ کی اسپیڈ سے متاثرہ گاڑی کو زوردار ٹکر ماری جس سے گاڑی 70 فٹ روڈ سے دور جاگری اور گاڑی میں سوار تمام افراد جاں بحق ہوگئے۔
