بھارتی کرکٹ ٹیم کے کپتان روہت شرما نے ٹیسٹ کرکٹ سے ریٹائرمنٹ کا ارادہ ظاہر کردیا ہے۔ یہ فیصلہ نیوزی لینڈ کے خلاف ہوم گراؤنڈ پر کلین سوئپ اور آسٹریلیا کے خلاف بارڈر گواسکر ٹرافی میں مسلسل ناکامیوں کے بعد سامنے آیا ہے۔ ٹائمز آف انڈیا کی رپورٹ کے مطابق، روہت شرما آسٹریلیا کے خلاف سیریز کے آخری ٹیسٹ میچ کے بعد باضابطہ طور پر اپنے ریٹائرمنٹ کا اعلان کریں گے۔
روہت شرما کی حالیہ کارکردگی ان کے اس فیصلے کی بڑی وجہ بنی ہے۔ آسٹریلیا کے خلاف جاری سیریز میں انہوں نے تین میچوں میں محض 31 رنز بنائے ہیں، جو کہ گیند باز جسپریت بمرا کی جانب سے حاصل کی گئی 30 وکٹوں سے صرف ایک رن زیادہ ہیں۔ آسٹریلیا کے شہر پرتھ میں کھیلے گئے پہلے ٹیسٹ میں بھارت نے جسپریت بمرا کی قیادت میں 295 رنز سے فتح حاصل کی، لیکن اس کے بعد کی کارکردگی انتہائی مایوس کن رہی۔ تیسرا ٹیسٹ میچ بارش کے باعث بغیر کسی نتیجے کے ختم ہوا، جبکہ باقی میچوں میں بھارت کو شکست کا سامنا کرنا پڑا۔ پانچ میچوں کی اس سیریز میں آسٹریلیا کو 1-2 کی برتری حاصل ہے، اور یہ بھارت کے لیے مزید مشکلات کا سبب بنی ہے۔
بھارتی کرکٹ بورڈ (بی سی سی آئی) اور قومی سلیکٹرز نے روہت شرما سے ان کے مستقبل کے بارے میں بات کی ہے، لیکن ابھی تک ان کے ریٹائرمنٹ کے حتمی اعلان کے وقت کا تعین نہیں کیا جا سکا۔ رپورٹ کے مطابق، روہت ممکنہ طور پر آخری ٹیسٹ میچ کے بعد اپنے فیصلے کا اعلان کریں گے۔ تاہم اگر بھارت کسی طرح ورلڈ ٹیسٹ چیمپئن شپ کے فائنل تک پہنچنے میں کامیاب ہوجاتا ہے، تو روہت شرما اپنے فیصلے کو کچھ وقت کے لیے موخر کرسکتے ہیں۔
ذرائع کے مطابق، روہت شرما بورڈ حکام اور سلیکٹرز کو قائل کرنے کی کوشش کرسکتے ہیں کہ انہیں ورلڈ ٹیسٹ چیمپئن شپ کے فائنل تک کھیلنے کا موقع دیا جائے۔ اگرچہ ان کی حالیہ کارکردگی پر سوالات اٹھائے جا رہے ہیں، لیکن وہ بھارتی کرکٹ ٹیم کے اہم ترین کھلاڑیوں میں سے ایک رہے ہیں۔
روہت شرما کا ممکنہ ریٹائرمنٹ بھارتی کرکٹ کے لیے ایک بڑا موڑ ثابت ہوسکتا ہے۔ ان کی قیادت میں ٹیم نے کئی اہم کامیابیاں حاصل کیں، لیکن حالیہ ناکامیوں نے ان کے کیریئر کے آخری مرحلے پر دباؤ ڈال دیا ہے۔
- Featured Thumbs
- https://www.siasat.pk/data/files/s3/13rohiaresjhdjd.png
