پی ٹی آئی انٹراپارٹی انتخابات کیخلاف لیگی کارکنوں کا احتجاج، سوشل میڈیا پر نئی بحث کا آغاز۔۔ مسلم لیگ ن کے کارکنوں کو پی ٹی آئی احتجاج بنانے کی بھونڈی سازش بے نقاب، تمام میڈیا جھوٹ پھیلا رہا تھا:سوشل میڈیا صارفین
پاکستان تحریک انصاف کے انٹراپارٹی انتخابات کے خلاف الیکشن کمیشن آف پاکستان کے باہر احتجاج کرنے کے لیے سابق وفاقی وزیر ڈاکٹر طارق فضل چوہدری کی طرف سے بلائے گئے مسلم لیگ ن کے لوگوں کی ویڈیوز سامنے آگئیں جس پر سوشل میڈیا میں ایک نئی بحث کا آغاز ہو گیا اور دلچسپ تبصرے سامنے آ رہے ہیں۔
سوشل میڈیا صارفین کا کہنا تھا کہ ان ویڈیوز سے ثابت ہو رہا ہے کہ میڈیا جھوٹ پھیلا رہا ہے اور اس سے ظاہر ہوتا ہے کہ 9 مئی کروانے والے لوگ کون تھے؟
ایک سوشل میڈیا صارف احمد وڑائچ کا ن لیگی کارکنوں کی پی ٹی آئی انٹراپارٹی انتخابات کیخلاف احتجاج کرنے کی ویڈیو پر ردعمل دیتے ہوئے کہنا تھا کہ : جس حساب سے یہ ویڈیوز سامنے آ رہی ہیں ان سے تو لگتا ہے کہ ڈاکٹر طارق فضل چودھری نے اپنے سارے کارکن ہی الیکشن کمیشن آف پاکستان کے باہر پی ٹی آئی انٹراپارٹی انتخابات کے خلاف احتجاج کے لیے بھیج دیئے ہیں۔
ایک صارف نے لکھا کہ: تحریک انصاف کے انٹراپارٹی انتخابات پر جو جماعت احتجاج کروا سکتی ہے کیا اسی جماعت نے 9 مئی نہیں کروایا ہو گا۔
معروف یوٹیوبر وقار ملک نے ویڈیو پر ردعمل دیتے ہوئے لکھا: مسلم لیگ ن کے کارکنوں کو پی ٹی آئی احتجاج بنانے کی بھونڈی سازش بے نقاب، تمام میڈیا جھوٹ پھیلا رہا تھا، وہاں اس بھائی نے رنگ میں بھنگ ڈال دی!
علی رضا نے لکھا:مسلم لیگ ن کے کارکنوں کو جیسے آج پی ٹی آئی کارکنوں کے روپ میں بنا رکاوٹ ریڈزون پہنچایا گیا ویسے ہی 9 مئی کو تخریب کار پی ٹی آئی کارکنوں کے روپ میں لائے گئے تھے۔
وقاص امجد نے لکھا کہ: الیکشن کمیشن آف پاکستان کے باہر مسلم لیگ ن کے کارکن تحریک انصاف میں جمہوریت لانے کیلئے احتجاج کرتے رنگے ہاتھوں پکڑے گئے۔ طارق فضل چوہدری کی ایک لیگی کارکن کے ساتھ تصویر شیئر کرتے ہوئے لکھا کہ ان کو پھول دینے والا شخص احتجاج میں سب سے آگے ہے!
تحریک انصاف کے رہنما تیمور خان جھگڑا نے لکھا کہ: مسلم لیگ ن (لاڈلا) کے کارکنوں کو پی ٹی آئی کے اندر جمہوریت لانے کا کتنا خیال ہے، مسلم لیگ ن کا دوسری جماعتوں میں شاہی سیاست کے خلاف موقف دیکھ کر بہت اچھا لگا۔
مونس الٰہی نے الیکشن کمیشن کے باہر ایک شخص کی یہ اعتراف کرتے کہ اسے ڈاکٹر طارق فضل چودھری نے الیکشن کمیشن کے باہر بھیجا ہے کی ویڈیو شیئر کر دی جس پر ردعمل میں سینئر صحافی وتجزیہ کار صابر شاکر نے لکھا کہ: آج پتا چل ہے کہ اکبر ایس بابر کے پیچھے کون ہے۔
لائبہ طارق نے ویڈیو پر ردعمل میں لکھا کہ: "کمپنی اینڈ کو" ایک بار پھر سے پکڑے گئے ہیں!
سینئر صحافی صابر شاکر نے لکھا کہ یہ ویڈیو چیف الیکشن کمشنر اور ممبر الیکشن کمیشن خیبرپختونخوا کے لیے ہے جو فیصلہ کر چکے ہیں کہ تحریک انصاف سے بلے کا نشان واپس لینا ہے۔
احمد وڑائچ نے ویڈیو پر ردعمل دیتے ہوئے کہا کہ انتخابات کا اتنا ڈر ہے نوازشریف کو، میاں نوازشریف کی 42 سالہ سیاسی جدوجہد کی یہ اوقات ہے!
اپنے ایک اور پیغام میں لکھا کہ الیکشن کمیشن کے باہر پی ٹی آئی نے احتجاج کیا تھا تو دہشت گردی کا مقدمہ درج ہو گیا، عمران خان اور شاہ محمود قریشی ابھی تک کیس بھگت رہے ہیں حالانکہ وہ وہاں خود موجود بھی نہیں تھے۔ پولیس کے پروٹوکول میں الیکشن کمیشن کے باہر احتجاج کرنے والے یہ لوگ کون ہیں؟ ان کو لایا کون؟ کوئی مقدمہ؟
تحریک انصاف کے رہنما مزمل اسلم نے اپنے پیغام میں لکھا کہ: جب خود کے پاس جلسہ کرنے کے لئے لوگ نا ہوں تو مخالف کے خوف میں ایسے کام شروع کر دیتے ہیں!
احمد جنجوعہ نے لکھا کہ: پاکستان تحریک انصاف کے انٹراپارٹی انتخابات کے خلاف احتجاج ہو رہا ہے لیکن یہ نہیں پتا کہ چیئرمین کون منتخب ہوا ہے، یہ بھی نہیں پتا کہ الیکشن کب ہوااور کیسے ہوا۔ عمران خان نے ٹھیک ہی کہا تھا کہ ن لیگ والے پڑھے لکھے نہیں ہیں اور نہ ہی یہ کوشش کرتے ہیں۔
- Featured Thumbs
- https://www.siasat.pk/data/files/s3/englh1i13h.jpg
