وفاقی وزیر داخلہ محسن نقوی کی جانب سے پی ٹی آئی کے گزشتہ ماہ کے احتجاج کے دوران 120 افغان باشندوں کو گرفتار کیے جانے سے متعلق دعوے پر اہم سوالات اٹھ گئے ہیں، اس دعوے کے حوالے سے نا صرف اسلام آباد پولیس بلکہ محسن نقوی کی اپنی وزارت داخلہ بھی کوئی ٹھوس شواہد فراہم نہیں کرسکی۔
اسلام آباد: وزیر داخلہ محسن نقوی کے دعوے پر سوالات اٹھ گئے ہیں کہ پاکستان تحریک انصاف کے دو روزہ احتجاج کے دوران گزشتہ ماہ 120 افغان شہریوں کو گرفتار کیا گیا تھا۔ وزارت داخلہ اور اسلام آباد پولیس کے افسران ابھی تک اس دعوے کی تصدیق کے لیے کوئی ٹھوس شواہد فراہم نہیں کر سکے۔
پانچ اکتوبر کو وزیر داخلہ محسن نقوی نے اسلام آباد پولیس کے انسپکٹر جنرل علی ناصر رضوی کے ساتھ ایک پریس کانفرنس کے دوران دعویٰ کیا تھا کہ 4 اکتوبر کو پاکستان تحریک انصاف کے احتجاج کے دوران 120 افغان شہریوں کو گرفتار کیا گیا۔ وزیر داخلہ نے کہا کہ کل رات جو جھڑپیں ہوئی ہیں، ان میں 120 افغان شہری گرفتار ہوئے ہیں، جو کہ ایک الارمنگ چیز ہے۔
محسن نقوی نے اسی دعوے کو اگلے دن ایک اور میڈیا بریفنگ میں دہرایا، لیکن ان دعووں کی تصدیق کے لیے وزارت داخلہ اور اسلام آباد پولیس کی جانب سے کوئی ٹھوس ثبوت فراہم نہیں کیا گیا۔
جیو فیکٹ چیک نے 7 اکتوبر سے 4 نومبر تک وزارت داخلہ اور اسلام آباد پولیس کے سینیئر حکام سے وزیر داخلہ کے دعوے کی تصدیق کے لیے متعدد بار رابطہ کیا، لیکن کسی بھی درخواست پر کوئی جواب نہیں ملا۔ 7 اکتوبر کو جیو فیکٹ چیک نے وزارتِ داخلہ کے ڈائریکٹر جنرل میڈیا قادریار ٹوانہ سے رابطہ کیا، تاہم انہوں نے اس معاملے کے حوالے سے اسلام آباد پولیس سے رابطہ کرنے کی ہدایت کی۔
اسی دن اسلام آباد پولیس کے ترجمان تقی جواد نے کہا کہ اس حوالے سے وزارت داخلہ سے رابطہ کیا جائے۔ تاہم، جب جیو فیکٹ چیک نے بار بار اس معاملے پر درخواست کی، تو تقی جواد نے صرف یہ کہا کہ گرفتار افغان شہریوں کا ڈیٹا عدالت میں پیش کرنے کے بعد شیئر کیا جائے گا، اور ان کا دعویٰ تھا کہ "سرکاری ادارہ کوئی بیان دیتا ہے تو وہ کسی بنیاد پر ہی دیتا ہے، ہم کوئی سیاسی لوگ نہیں ہیں کہ بے بنیاد بیان دے دیں۔"
متعدد بار جیو فیکٹ چیک کی جانب سے کی جانے والی متعدد درخواستوں کا کوئی جواب نہیں آیا۔ 31 اکتوبر کو دوبارہ رابطہ کرنے پر تقی جواد نے کہا کہ "ڈیٹا صرف وزارتِ داخلہ جاری کر سکتی ہے" اور وزارت خارجہ سے رابطہ کرنے کی تجویز دی۔ جب جیو فیکٹ چیک نے وزارتِ داخلہ کے قادر یار ٹوانہ سے دوبارہ رابطہ کیا، تو ان کی جانب سے کوئی جواب نہیں آیا۔ وزارت خارجہ کی ترجمان ممتاز زہرہ بلوچ نے بھی اس معاملے پر کوئی معلومات فراہم نہیں کیں۔
اسلام آباد پولیس کے سینیئر حکام، محمد ارسلان شہزاد (سینیئر سپرنٹنڈنٹ آف پولیس، آپریشنز) اور علی رضا (ڈپٹی انسپکٹر جنرل آف پولیس، آپریشنز) کی جانب سے بھی جیو فیکٹ چیک کی درخواستوں کا کوئی جواب نہیں آیا۔
وزیر داخلہ کے دعوے کے باوجود، نہ تو وزارت داخلہ اور نہ ہی اسلام آباد پولیس اس بات کو ثابت کرنے کے لیے کوئی دستاویزی شواہد فراہم کر سکی ہیں۔ اس کے علاوہ، جیو فیکٹ چیک کی جانب سے متعدد بار رابطہ کرنے کے باوجود حکام نے اس معاملے میں مکمل طور پر خاموشی اختیار کی ہے۔ اب تک اس معاملے کی تحقیقات اور شواہد کی فراہمی کا انتظار کیا جا رہا ہے۔
