حکومتی اتحادی جماعت پاکستان پیپلزپارٹی نے پی ٹی آئی پر پابندی کے حکومتی فیصلے سے لاتعلقی کا اظہار کردیا ہے۔
تفصیلات کے مطابق یہ اعلان گورنر پنجاب سردار سلیم حیدر خان نے وزیرآباد میں میڈیا کے نمائندوں سے گفتگو کرتے ہوئے کیا اور کہا کہ پاکستان تحریک انصاف پر پابندی کے فیصلے پر ن لیگ نے پیپلزپارٹی سے کوئی مشاورت نہیں کی یہ ن لیگ کا اپنا فیصلہ ہے۔
انہوں نے مزید کہا کہ پیپلزپارٹی اس معاملے کو پارٹی کی سی ای سی میں لے کر جائے گی ، میری ذاتی رائے پوچھی جائے تو پی ٹی آئی کو دو حصوں میں دیکھا جانا چاہیے۔
گورنر پنجاب کا کہنا تھا کہ ایک پی ٹی آئی وہ ہےجو 9 مئی کے واقعات میں ملوث ہے، انہیں سزائیں ملنی چاہیے، تاہم کچھ لوگ اس جماعت میں ایسے ہیں جو محب وطن ہیں ان کے خلاف بھی وہی کارروائی ہونا مناسب نہیں ہے۔
خیال رہے کہ گزشتہ دنوں وفاقی حکومت نے پاکستان تحریک انصاف پر پابندی کا اعلان کرتے ہوئے سابق وزیراعظم اور بانی پی ٹی آئی عمران خان اورسابق صدر مملکت ڈاکٹر عارف علوی کے خلاف آرٹیکل 6 کے تحت مقدمہ قائم کرنے کا فیصلہ کیا تھا۔
- Featured Thumbs
- https://www.siasat.pk/data/files/s3/sarda1h112.jpg
