بنگلہ دیش کوسیریز کے آخری میچ میں بھی شکست دینے کے بعد پاکستانی ٹیم رواں سال میں سب سے زیادہ میچز جیتنے والی ٹیم بن گئی ہے۔
پاکستان کرکٹ بورڈ کی جانب سے مائیکروبلاگنگ ویب سائٹ ٹویٹر پر اپنے آفیشل ہینڈل سے رواں سال میں دنیا کی تمام کرکٹ ٹیموں کی ٹی 20 کارکردگی کے حوالے سے ایک چارٹ شیئر کیا گیا۔
پی سی بی کی جانب سے رواں سال میں سب سے زیادہ ٹی 20 فتوحات کی اس لسٹ میں سب سے اوپر نام پاکستان کا ہے جس نے کل 26 میچز کھیل کر 17 میں فتح حاصل کی۔ پاکستان نے اس ایک سال میں 6 میچز میں شکست کھائی جبکہ تین میچز بغیر کسی نتیجے کے ختم ہوئے۔
فہرست میں دوسرا نام ساؤتھ افریقہ کا ہے جس نے23 میچز کھیل کر 15 جیتے، نیوزی لینڈ23 میچز میں سے 13 جیت کر تیسرے نمبر پر رہا۔
کرکٹ میں پاکستان کا روایتی حریف رواں سال کوئی خاطر خواہ کارکردگی نہ دکھا سکا اور ٹی 20 کرکٹ میں سب سے زیادہ فتوحات کی اس فہرست میں ساتویں نمبر پر براجمان ہے، بھارت نے 16 میچز میں سے صرف 10 میچز جیتے ہیں۔
واضح رہے کہ پاکستانی کرکٹ ٹیم اس وقت بنگلہ دیش میں موجود ہے، دونوں ٹیموں کے درمیان ٹی 20 سیریز کاتیسرا اور آخری میچ کھیلا گیا جس میں جیت کر پاکستان نے سیریز 3-0 سے اپنے نام کرتے ہوئے بنگلہ دیش کو وائٹ واش کردیا ہے۔
