سربراہ پی ڈی ایم اور جمعیت علماء اسلام (ف) مولانا فضل الرحمان کا اپنے بیان میں کہنا ہے کہ پارلیمنٹ لاجز واقعہ کے رونما ہونے کے پیچھے وجہ ہے کہ تاریخ کے صفحات سے حکومت نے اپنے سیاہ کردار کی پردہ پوشی کرنے کی کوشش کی ہے۔
سوشل میڈیا پر جاری اپنے آڈیو پیغام میں مولانا فضل الرحمان کا کہنا تھا کہ پارلیمنٹ لاجز سے ایم این ایز اور کارکنوں کی گرفتاری کے بعد ہمارے کارکنان نے پورے ملک کو ایک گھنٹے سے بھی کم وقت میں جام کر دیا۔
انہوں نے کہا کہ پارلیمنٹ لاجز میں اسلام آباد پولیس نے تمام قوانین اور اخلاقیات کو روندتے ہوئے دھاوا بولا، ممبران پارلیمنٹ پر بلا جواز تشدد کیا گیا اور ملک کے منتخب نمائندوں کو گھسیٹتے ہوئے گرفتار کیا گیا، اس واقعے میں مہمانوں کو بھی زد و کوب اور گرفتار کیا گیا۔
سربراہ پی ڈی ایم نے یہ بھی کہا کہ واقعے کی غلط تصویر اور جھوٹ پر مبنی بیانیہ قوم کے سامنے رکھا گیا، تاریخ کے صفحات پر اپنے سیاہ کردار کی پردہ پوشی کی بھونڈی کوشش کی گئی ہے۔ لیکن ہم جے یو آئی اور دیگر جماعتوں کے کارکنوں اور عوام کا شکریہ ادا کرتے ہیں۔ کارکنوں اور عوام کو اس فتح پر مبارکباد پیش کرتا ہوں۔
مولانا نے یہ بھی کہا کہ صبح ہونے سے پہلے ہی تمام ممبران قومی اسمبلی اور ہمارے کارکن رہا ہوچکے ہیں، رہائی نہ ملنے کی صورت میں ہم نے دوبارہ سڑکوں پر آنے کا فیصلہ کیا تھا، مگر اب کارکنوں کی رہائی کے لیے سڑکوں پر آنے کی ضرورت باقی نہیں رہی۔
