آئی سی سی ٹی 20 ورلڈ کپ کے گزشتہ روز ہونے والے میچ میں آصف علی کے شاندار 4 چھکوں کی مدد سے پاکستان نے افغانستان کے خلاف فتح حاصل کرکے سیمی فائنل تک رسائی کے لیے امکانات روشن کرلیے، ٹوئٹر پر سابق کرکٹرز، سیاست دانوں اور عام سوشل میڈیا صارفین کی جانب سے آصف علی کو خوب داد دی جارہی ہے کہ انہوں نے بہت پریشر کے وقت میں باکمال کھیلا۔
آصف علی نے 4 چھکے لگا کر 19ویں اوور میں ہی پاکستان کو افغانستان سے فتح دلائی اور میچ کے بہترین کھلاڑی قرار پائے۔ انہوں نے 7 گیندوں پر 4 چھکوں کی مدد سے 25 رنز کی یادگار اننگز کھیلی۔ دنیا بھر سے سوشل میڈیا صارف آصف علی کی کارکردگی کو سراہ رہے ہیں۔ افغانستان کے خلاف فتح کے ساتھ میچ ختم ہوتے ہی ٹوئٹر پر آصف علی ٹاپ ٹرینڈ بن گیا۔
آصف علی کے چارچھکوں کا موازنہ کارلوس بریتھ ویٹ کے چھکوں سے بھی کیا جا رہا ہے۔ یاد رہے کہ کارلوس نے2016 کے ٹی 20 ورلڈ کپ فائنل میں انگلش بولر بین اسٹوکس کوچارچھکے لگا کر ویسٹ انڈیز کو چیمپئن بنوایا تھا۔ اس موقع پر ویسٹ انڈیز سے تعلق رکھنے والے کمنٹیٹر این بشپ نے کہا تھا کہ کارلوس بریتھ ویٹ ریمیمبر دا نیم۔
میچ میں یادگار فتح دلانے پر وزیراعظم عمران خان نے بھی قومی ٹیم کی تعریف کی اور ٹوئٹر پر کہا کہ پاکستانی ٹیم کو بہت زیادہ مبارکباد، انہوں نے افغان کرکٹ ٹیم کی تعریف کرتے ہوئے کہا کہ افغان ٹیم کی جانب سے متاثر کن کھیل پیش کیا گیا۔ میں نے کسی ٹیم کو اتنی تیزی سے عالمی کرکٹ میں اپنی جگہ بناتے اور مقابلے کی غیرمعمولی قابلیت حاصل کرتے نہیں دیکھا، افغانستان میں کرکٹ کا مستقبل روشن ہے۔
چیئرمین پی سی بی رمیز راجا نے لکھا کہ آصف، پریشر میں کیا شان دار ہٹنگ کی، ٹیم کو مبارک ہو۔
قومی اسمبلی کے اپوزیشن لیڈر شہباز شریف نے کہا پاکستان جیتے تو انٹرٹینمنٹ کی گارنٹی ہے۔
وزیرخارجہ شاہ محمود قریشی نے بھی ٹیم کو مسلسل فتوحات پر مبارک باد اور اچھی کارکردگی پر افغان ٹیم کی بھی تعریف کی۔
مریم نواز نے محمد آصف کی تعریف کرتے ہوئے کہا کہ انہوں نے بہت زبردست پاور ہٹنگ کا مظاہرہ کیا، انہوں نے اس بہترین جیت کیلئے پاکستانی ٹیم کا شکریہ بھی ادا کیا۔
وفاقی وزیر انسانی حقوق شیریں مزاری نے لکھا کہ پاکستان ٹیم ایک اور شان دار کامیابی، مبارک ہو! آصف علی زبردست کھیلے اور باقی ٹیم نے بھی بہترین کھیل کا مظاہرہ کیا۔
انگلش کرکٹر بین اسٹوکس کا کہنا تھا کہ آصف علی کا نام یاد رکھیے۔
پاکستانی خاتون کرکٹر ثنامیر نے لکھا کہ سیمی فائنل کے قریب پہنچنے والی پہلی ٹیم پاکستان ہے، شاباش، آصف علی۔
فاسٹ باؤلر وہاب ریاض نے آصف علی کی کارکردگی کی تعریف کرتے ہوئے کہا کہ یہ ٹیم قابل فخر ہے اور بہترین انداز میں اس ایونٹ میں کھیل رہی ہے۔
ارحان خان نامی صارف نے کہا کہ آصف علی اصل بادشاہ ہے کیا ہی خوبصورتی کے ساتھ اس نے میچ کا اختتام کیا ہے۔
حمزہ کلیم بٹ نے آزاد کشمیر کی تصاویر شیئر کرتے ہوئے کہا کہ پاکستان کی جیت پر یہاں بڑی تعداد میں لوگوں نے باہر نکل کر جشن منایا ہے۔
عبدالمناف سکھیرا نے کہا کہ آصف کے چار چھکے دیکھ کر انہیں شاہد آفریدی یاد آ گئے جنہوں نے ہربجن سنگھ کو 4 چھکے مارے تھے۔
عمیر نے کہا کہ آصف علی نے ایک سال پہلے اپنی بیٹی کو کھویا تھا وہ اس وجہ سے کافی پریشان رہا کرتے تھے، لیکن اس کے باوجود اگر آپ انہیں کھیلتا ہوا دیکھیں تو تعریف کیے بغیر نہیں رہ سکیں گے۔
عمران راجہ نے کہا کہ شاداب سنگل لینا چاہتے تھے مگر آصف کا کہنا ہے کہ وہ ایسے رنز ہی نہیں بناتے جن کیلئے بھاگنا پڑے۔ انہوں نے ساتھ آصف علی زرداری کی تصویر شیئر کی۔
- Featured Thumbs
- https://www.siasat.pk/data/files/s3/asif.jpg
Last edited:
