
شاہ محمود قریشی کی جانب سے سعودی سفیر کے طرف پاؤں کرکے ٹانگ پر ٹانگ رکھ کر بیٹھنے پر طاہر اشرفی نے وضاحت دیدی ہے۔
تفصیلات کے مطابق گزشتہ دنوں ایک تصویر سوشل میڈیا پر وائرل ہوئی جو وزیر خارجہ شاہ محمود قریشی کی سعودی سفیر کے ساتھ ملاقات میں کھینچی گئی تھی، اس تصویر میں شاہ محمود قریشی سعودی سفیر کی جانب جوتا کیے ٹانگ پر ٹانگ رکھ کر بیٹھےدکھائی دے رہے تھے۔
تصویر کے سامنے آنے کےبعد نہ صرف پاکستانی بلکہ سعودی شہریوں کی جانب سے بھی شدید ناراضگی کا اظہار کیا گیا اور اسے شاہ محمود قریشی کی بدتہذیبی، ناشائستہ انداز اور ناقص تربیت سے تشبہہ دی گئی۔
تاہم اس حوالے سے وزیراعظم عمران خان کے معاون خصوصی برائے بین المذاہب ہم آہنگی و مشرق وسطیٰ طاہر اشرفی کی جانب سے ایک وضاحتی بیان سامنے آیا ہے جس میں انہوں نے شاہ محمود قریشی کی اس حرکت کا دفاع کرنے کی کوشش کی ہے۔
طاہر اشرفی نے کہا کہ سعودی سفیر سرکاری و عوامی سطح پر بہت احترام کیا جاتا ہے، شاہ محمود قریشی کی کمر کا مسئلہ ہے جس کی وجہ سے وہ اکثر ایسے ہی بیٹھے دکھائی دیتے ہیں، رسمی ملاقاتوں میں بیٹھنے کا انداز مختلف ہوتا ہے مگر شاہ محمود قریشی کمر کی وجہ سے ایسے بیٹھتے ہیں۔
طاہر اشرفی نے مزید کہا کہ سعودی سفیر گزشتہ 7 سال سے پاکستان میں ہیں، پاکستان اور سعودی عرب کے تعلقات کی گواہی پوری دنیا دیتی ہے، دونوں ملکوں کی دوستی کو پسند نہ کرنے والے لوگوں نے اس تصویر کو متنازعہ بنانے اور معاملے کو اچھالنے کی زیادہ کوشش کی ہے۔