وزیراعظم کا منصب سنبھالنے کے بعد شہباز شریف کی پاکستان مسلم لیگ ن کے قائد میاں محمد نواز شریف سے لندن میں پہلی ملاقات ہوئی جس میں قبل از وقت انتخابات کو خارج الامکان قرار دیتے ہوئے کہا گیا کہ انتخابی اصلاحات مکمل ہونے پر ہی جنرل الیکشن کا انعقاد ہو گا ۔
تفصیلات کے مطابق وزیر اعظم شہباز شریف پاکستان مسلم لیگ ن کے قائد سے ملاقات کیلئے لندن پہنچ گئے، جہاں پر ان کی سابق وزیراعظم سے ون آن ون ملاقات ہوئی ہے، نواز شریف انتہائی گرم جوشی سے ملے اور شہباز شریف کو تھپکی بھی دی۔
اس موقع پر نواز شریف سے احسن اقبال، مفتاح اسماعیل، مریم اورنگزیب، خواجہ آصف شاہد خاقان اور سعد رفیق نے بھی ملاقات کی، ملاقات میں اسحاق ڈار عابد شیر علی اور سلیمان شہباز بھی موجود تھے
ملاقات کے دوران لیگی قائد نے سابق صدر آصف زرداری سے فون پر ہونے والی گفتگو سے وزیراعظم شہباز شریف کو آگاہ کیا۔
ذرائع کے مطابق وزیراعظم شہباز شریف اور ن لیگی قائد نواز شریف کی ملاقات کے دوران اتفاق پایا گیا کہ ملک میں جلد انتخابات کا کوئی امکان نہیں،جنرل الیکشن انتخابی اصلاحات مکمل ہونے پر ہی ہوں گے۔
دوسری جانب مسلم لیگ ن کی نائب صدر مریم نواز نے سماجی رابطے کی ویب سائٹ پر شہباز شریف اور نوازشریف کی ملاقات کی تصویر شیئر کی اور لکھا کہ ’وہ کتنے خوش قسمت ہوتے ہیں جنہیں یہ عقیدتیں اور محبتیں نصیب ہوتی ہیں‘۔
مریم نواز نے ایک اور ٹوئٹ میں دونوں بھائیوں کی ایک اور تصویر شیئر کی جس میں دیکھا جاسکتا ہے کہ وزیراعظم شہباز شریف جھک کر اپنے بھائی نواز شریف سے گلے مل رہے ہیں۔
