پاکستان کرکٹ بورڈ نے نیوزی لینڈ کرکٹ بورڈ کی جانب سے سیریز معطل کرنے کے فیصلے کا معاملہ انٹرنیشنل کرکٹ کونسل میں اٹھانے کا اعلان کردیا ہے۔
مائیکروبلاگنگ ویب سائٹ پر پی سی بی کے چیئرمین رمیز راجہ نے اپنے بیان میں کہا ہے کہ نیوزی لینڈ کے اس فیصلے کو آئی سی سی میں اٹھائیں گے۔ انہوں نے مزید کہا کہ یہ ایک افسوسناک دن تھا ، مجھے ہمارے شائقین کرکٹ اور کھلاڑیوں کیلئے بہت افسوس ہے۔
رمیز راجہ نے کہا کہ سیکیورٹی خدشات کو بنیاد بنا کر یکطرفہ طور پر سیریز معطل کرنے اور ٹیم کی واپسی کا فیصلہ کرنا افسوس ناک ہے، خصوصاً جب اس بارے میں کوئی تفصیل بھی شیئر نہ کی گئی ہو، نیوزی لینڈ کس دنیا میں رہ رہا ہے۔
چیئرمین پی سی بی نے اپنے بیان میں سخت ردعمل دیتے ہوئے نیوزی لینڈ کو پیغام دیا کہ اب وہ انہیں آئی سی سی کے پلیٹ فارم پر دیکھیں گے۔
واضح رہے کہ پاکستانی اور نیوزی لینڈ کے درمیان طے سیریز میں اچانک نیوزی لینڈ کرکٹ نے سیکیورٹی خدشات کو بنیاد بنا کر دورہ ختم کرنے کا اعلان کیا جس کے باعث سیریز معطل ہوگئی، وفاقی وزیراطلاعات فواد چوہدری کا کہنا تھا کہ وزیراعظم عمران خان نے اس حوالے سے نیوزی لینڈ کی وزیراعظم سے رابطہ بھی کیا ہے اور پاکستان کی سیکیورٹی اور انٹیلیجنس معیار پر انہیں اعتماد میں لیا۔
فواد چوہدری کے مطابق نیوزی لینڈ کی وزیراعظم نے پاکستانی سیکیورٹی پر مکمل اعتماد کا اظہار کرتے ہوئے کہا کہ نیوزی لینڈ ٹیم کو پاکستان میں کسی قسم کا خطرہ نہیں ہے تاہم از خود احتیاطی پالیسی کے تحت دورہ ملتوی کرنے کا فیصلہ کیا گیا ہے۔