نیتن یاہو کے وارنٹ جاری کرنےکےعدالتی فیصلے کا احترام کرناچاہیے، یورپی یونین

یورپی یونین کی خارجہ پالیسی چیف جوزف بوریل نے اسرائیلی وزیرِ اعظم نیتن یاہو کے وارنٹ گرفتاری جاری ہونے پر اپنے بیان میں کہا ہے کہ عدالت کے فیصلے کا احترام کرنا ضروری ہے۔

جوزف بوریل نے مزید کہا کہ عالمی فوجداری عدالت (آئی سی سی) کا اسرائیلی وزیرِ اعظم نیتن یاہو اور سابق وزیرِ دفاع یواف گیلنٹ کے وارنٹ گرفتاری جاری کرنے کا فیصلہ سیاسی نہیں بلکہ عدالتی نوعیت کا ہے۔

انہوں نے یہ بھی کہا کہ عدالتی فیصلے کا نفاذ یورپی یونین کے تمام ممالک پر لازم ہے

اسرائیلی وزیرِ اعظم کے وارنٹ گرفتاری کے جاری ہونے کے بعد، نیدرلینڈز کے وزیرِ خارجہ نے پہلے ہی اسرائیلی وزیرِ اعظم کی گرفتاری کا عندیہ دیا تھا۔
پلسطینی مزاحمتی تنظیم حماس نے بھی عالمی فوجداری عدالت کے فیصلے کا خیرمقدم کیا ہے اور کہا کہ عدالت کو اسرائیل کے تمام مجرم رہنماؤں کے خلاف احتساب کا دائرہ بڑھانا چاہیے۔

نیتن یاہو کے وارنٹ گرفتاری پر فرانس کی وزارتِ خارجہ نے کہا ہے کہ فرانس کا ردعمل عدالت کے اصولوں کے مطابق ہوگا۔

اسی حوالے سے اردن کے وزیرِ خارجہ نے بھی ردعمل دیتے ہوئے کہا کہ نیتن یاہو اور گیلنٹ کی گرفتاری کے آئی سی سی کے فیصلے پر عمل اور اس کا احترام ہونا چاہیے، کیونکہ فلسطینی عوام انصاف کے حق دار ہیں۔

یاد رہے کہ عالمی فوجداری عدالت نے آج اسرائیلی وزیرِ اعظم بنیامین نیتن یاہو کے وارنٹ گرفتاری جاری کر دیے ہیں، جن پر جنگی جرائم کے ارتکاب کا الزام عائد کیا گیا ہے۔
عالمی فوجداری عدالت نے جنگی جرائم کے الزام میں سابق اسرائیلی وزیرِ دفاع یواف گیلنٹ کے وارنٹ گرفتاری بھی جاری کیے ہیں۔