لندن میں نواز شریف کی رہائش گاہ کے باہر گارڈز نے ایک سترہ سالہ نوجوان کو تشدد کا نشانہ بنا ڈالا ،الٹاالزام بھی نوجوان پرلگادیا۔
تفصیلات کے مطابق لندن میں حسین نواز کی رہائش گاہ کے باہر ایک ناخوشگوار واقعہ پیش آیا ہے جس میں نواز شریف کے گارڈز اور ایک نوجوان کے درمیان جھگڑا ہوا ہے۔ سوشل میڈیا پر وائرل ہونےو الی ویڈیوز اور میڈیا رپورٹس کے مطابق سترہ سالہ شایان علی کونواز شریف کے گارڈز نے تشدد کا نشانہ بنایا اور تھپڑوں کی بارش کردی۔
شایان علی لندن میں نواز شریف اور ن لیگ کے خلاف متعدد مظاہرے کرچکاہے، شایان کی والدہ کے مطابق ان کے بیٹے کو ن لیگی قیادت کی ایماء پر تشدد کا نشانہ بنایا گیا ہے۔
دوسری جانب خبررساں ادارے جیو نیوز کے لندن میں نمائندہ خصوصی مرتضیٰ علی شاہ کے مطابق جولائی 2021 میں ایک ریسٹورنٹ میں عابد شیر علی کی شایان علی کےساتھ ہونےو الے جھگڑے کے نتیجےمیں آج 2 لوگ زخمی ہوگئے ہیں جس کے بعد معاملہ پولیس تک پہنچ گیا ہے۔
انہوں نے مزید کہا کہ شایان علی نے نواز شریف پر حملہ کرنے کی کوشش کی جس کو گارڈز نے ناکام بنادیا، شایان علی اور ان کی والدہ صدف ممتازنے مشتعل ہوکر گارڈز پر اپنے موبائل فون کی مدد سے حملہ کردیا، شایان علی کے والد نے پولیس کو بیان دیا ہے کہ نواز شریف کے گارڈز نے ان کے بیٹے کو تشدد کا نشانہ بنایا ہے۔
واضح رہے کہ جولائی 2021 میں لندن کے ایک ہوٹل میں عابد شیر علی اپنی فیملی کے لوگوں کے ہمراہ موجود تھے جب شایان علی کے والد اپنی اہلیہ کے ساتھ وہاں پہنچے اور دونوں کے درمیان شدید لفظی جنگ ہوئی جس میں گالیوں کا بھی بے دریغ استعمال کیا گیا تھا۔
