وفاقی وزیرخارجہ بلاول بھٹو زرداری کی سندھ کے ایک اسکول کے ننگے پیر، خستہ حال کپڑوں اور پسماندہ کلاس روم میں موجود بچوں کے ساتھ تصویر کے معاملے پر پی ٹی آئی اور پیپلزپارٹی کے رہنماؤں کے درمیان لفظی تکرار دیکھی گئی۔
تفصیلات کے مطابق چیئرمین پیپلزپارٹی بلاول بھٹو زرداری نے سندھ کے سیلاب زدہ علاقوں کا دورہ کیا اور لوگوں سے ان کے مسائل سنے، اس دوران بلاول بھٹو زرداری نے ایک مقام پر اسکول میں موجود بچوں سے ملاقات کی اور ان کی بچوں کے ہمراہ تصویر سوشل میڈیا پر وائرل ہوگئی۔
تصویر کا وائرل ہونا تھا کہ بلاول بھٹو زرداری کو شدید تنقید کا سامنا کرنا پڑا، لوگوں نے بچوں کی حالت کی طرف نشاندہی کرتے ہوئے بلاول بھٹو زرداری کو ہی تنقید کا نشانہ بنایا۔
سابق وفاقی وزیر اور پی ٹی آئی کے سینئر رہنما علی زیدی نے اس تصویر پر تبصرہ کرتے ہوئے کہا کہ کسی باڑے سے بھی بدتر اس کلاس روم میں تصویر کے بل بوتے پر بین الاقوامی فنڈنگ مانگی جائے گی مگر وہ فنڈنگ نا تو اسکول پہنچے گی نا بچوں کو ملے گی، خون سوچنے والے جعل ساز سندھ پر کئی دہائیوں سے حکمران ہیں۔
علی زیدی کو اس ٹویٹ پر رہنما پیپلزپارٹی اور وزیربلدیات سندھ ناصر حسین شاہ نے جواب دیتے ہوئے کہا کہ یہ تصویر ایک ایسے لیڈر کی ہےجس کی والدہ نے عوام کے اندر بیٹھ کر عوام کیلئے اپنی جان بھی قربان کی، جو شخص لوگوں کے پیاروں کی موت کی تعزیت بھی اپنے گھر بلا کر کرے، اس شخص کے لوگ اس خوشی کو محسوس نہیں کرسکتے جو ان بچوں کے درمیان رہ کر ملتی ہے۔
ناصر حسین شاہ نے کہا کہ آپ نے بچوں کے ننگے پاؤں دیکھے ہیں ہم ان کے دمکتے ہوئے چہرے دیکھتے ہیں۔
