غیر ملکی میڈیا کے مطابق نائیجیریا کی ریاست زمفارا میں مسلح گروہوں کے خلاف حکومتی کارروائی کے جواب میں موٹر سائیکل سوار ڈاکوؤں نے 10 سے زائد مختلف بستیوں پر دھاوا بول دیا اندھا دھند فائرنگ کے نتیجے میں 200 سے زائد افراد جاں بحق ہوگئے۔
رائٹرز کے مطابق نائیجیریا کی افواج اور فضائیہ نے گوسامی کے جنگلات اور تسمیرے گاؤں میں ڈاکوؤں کی کمین گاہوں کو نشانہ بنایا تھا جس میں 100 سے زائد ڈاکو مارے گئے جن میں دو سرغنہ بھی شامل ہیں۔
اس کارروائی کے نتیجے میں 300 سے زائد موٹر سائیکل سوار ڈاکوؤں نے زمفارا کی 10 سے زائد مختلف بستیوں پر حملہ کردیا شرپسندوں نے لُوٹ مار کی اور املاک کو نذر آتش کردیا۔ حکومت نے ان ڈاکوؤں کو دہشت گرد قرار دیتے ہوئے فیصلہ کن کارروائی کا عندیہ دیا ہے۔
غیر ملکی خبر رساں اداروں کا کہنا ہے کہ ڈاکوؤں کے حملے میں سیکڑوں دیہاتی جاں بحق ہوگئے تاہم حکومت کے مطابق ہلاکتوں کی تعداد 58 ہے۔ میتوں کو اجتماعی طور پر دفن کرنے والے دیہاتیوں نے مزید بتایا کہ اب بھی کئی افراد لاپتہ ہیں جو یا تو قتل کردیئے گئے ہیں یا پھر ڈاکو انہیں ساتھ لے گئے ہیں۔
- Featured Thumbs
- https://www.siasat.pk/data/files/s3/hakoom112121.jpg
