مصطفیٰ کمال کو دھاندلی کر کے جتوایا گیا: قادر خان مندوخیل
ایم کیو ایم کے شرپسند عناصر مختلف پولنگ سٹیشنز میں گھس کر دھاندلی کرتے رہے: رہنما پیپلزپارٹی
ملک بھر میں ہونے والے عام انتخابات کے نتائج کا اعلان ہو چکا ہے جس پر بڑے سوالیہ نشان موجود ہیں اور متعدد سیاسی جماعتوں کے رہنمائوں کی طرف سے دھاندلیوں کے الزامات بھی لگائے جا رہے ہیں۔ کراچی سے منتخب ہونے والے 21 اراکین قومی اسمبلی کی کامیابی کا نوٹیفکیشن جاری ہو چکا ہے جس میں ایم کیو ایم کے 15 اور پیپلز پارٹی کے 6 اراکین شامل ہیں۔ کراچی میں قومی اسمبلی کے حلقہ NA-242 سے ایم کیو ایم کی جیتی ہوئی نشست پر ری پولنگ کا مطالبہ کیا گیا ہے۔
ذرائع کے مطابق NA-242 کی نشست پر الیکشن میں ناکام رہنے والے پاکستان پیپلزپارٹی کے سینئر رہنما قادر خان مندوخیل نے الزام لگایا ہے کہ ایم کیو ایم رہنما مصطفیٰ کمال کو اس نشست سے دھاندلی کر کے زبردستی کامیاب کروایا گیا، میرے حلقے ووٹوں کی دوبارہ گنتی کروائی جائے۔
الیکشن کمیشن آف پاکستان میں متعدد امیدواروں کی طرف سے انتخابی عذرداریوں کی درخواستیں دائر کروانے کا سلسلہ جاری ہے، رہنما پاکستان پیپلزپارٹی قادر خان مندوخیل نے بھی الیکشن کمیشن سے رابطہ کر کے دوبارہ سے ری پولنگ کی درخواست کی۔ پی پی رہنما کا کہنا تھا کہ ایم کیو ایم کے شرپسند عناصر مختلف پولنگ سٹیشنز میں گھس کر دھاندلی کرتے رہے۔
قادر خان مندوخیل نے الیکشن کمیشن آفس کے باہر میڈیا سے گفتگو میں کہا میرے حلقہ NA-242 سے مصطفیٰ کمال کو دھاندلی کر کے زبردستی کامیاب کروایا گیا۔ میرے حلقے میں بہت سے حساس پولنگ سٹیشنز تھے جس پر الیکشن کمیشن کو بار بار آگاہ کیا لیکن انتظامات نہیں کیے گئے۔
علاوہ ازیں الیکشن کمیشن میں NA-242 کراچی کے ایک پولنگ سٹیشن پر توڑ پھوڑ کے کیس کی سماعت ہوئی جس میں قادر خان مندوخیل کو کلین چٹ دے دی گئی ہے۔ NA-242 کے ریٹرننگ آفیسر نے توڑپھوڑ کیس کی رپورٹ جمع کرواتے ہوئے پولنگ سٹیشن میں توڑ پھوڑ کی تردید کرتے ہوئے کہا کہ پولنگ کے عمل میں کوئی رکاوٹ پیدا نہیں ہوئی، ان کی ویڈیو جعلی ہے۔
