لاہور کی مقامی عدالت نے اداکارہ صبا قمر اور بلال سعید کی بریت کی درخواست مسترد کردی۔
تفصیلات کے مطابق لاہور کی مقامی عدالت میں اداکارہ صباقمر اور بلال سعید کی مسجد وزیر خان میں شوٹنگ کیس میں دائر بریت کی درخواست پر سماعت ہوئی، جوڈیشل مجسٹریٹ ثروت بتول نے ملزمان کی مقدمے سے بریت کی درخواست پر محفوظ فیصلہ سناتے ہوئے بریت کی درخواستیں مسترد کردیں۔
اداکارہ صباقمر کے وکیل کی جانب سے عدالت میں موقف اختیار کیا گیا ہے کہ محکمہ اوقاف کی انکوائری رپورٹ ہمارے حق میں ہے، اوقاف کے ریجنل مینجر اخلاق احمد نے رپورٹ میں کہا ہے کہ شوٹنگ کے دوران نہ غیر اخلاقی لباس پہنا گیا اور نہ ہی کوئی غیر اخلاقی حرکت ہوئی۔
جس پر سرکاری وکیل نے کہا کہ ہمارے پاس یوایس بی میں سارے ثبوت موجود ہیں ، یو ایس بی میں ڈانس کی ویڈیو بھی ہے۔
انہوں نے کہا کہ مسجد مسلمانوں کے عبادت کی جگہ ہے ڈانس کرنے کی جگہ نہیں ہے۔صباقمر اور بلال سعید نے مسجد کا تقدس پامال کرکے مسلمانوں کے جذبات جروح کیے۔
دونوں فریقین کے دلائل سننے کے بعد عدالت نے محفوظ فیصلہ سناتے ہوئے ملزمان کی بریت کی درخواست مسترد کردی ۔
عدالت نے 16 مارچ کو دونوں ملزموں کو فرد جرم کے لئے طلب کر لیا۔
کیس کا پس منظر
2020 میں صبا قمر اور گلوکار بلال سعید کی ایک وڈیو منظر عام پر آئی تھی۔ وڈیو کی عکس بندی لاہور کی تاریخی وزیر خان مسجد میں کی گئی تھی۔
وڈیو وائرل ہونے کے بعد صبا قمر اور بلال سعید نے عوام سے معافی مانگی تھی۔
بعد ازاں صبا قمر اور بلال سعید کے خلاف لاہور کے اکبری گیٹ تھانے میں فرحت منظور نامی کی شکایت پر مقدمہ درج کیا گیا۔
مقدمے میں موقف اختیار کیا گیا کہ ملزمان نے مسجد کے اندرر رقص اور گانا عکس بند کر کے مسلمانوں کے مذہبی جذبات کو شدید ٹھیس پہنچائی ہے۔
- Featured Thumbs
- https://www.siasat.pk/data/files/s3/courthh11i211.jpg
