ایک اور ہوم سیزن میں مایوس کُن نتائج کے باعث پاکستان کرکٹ ٹیم کی قیادت اور اس کی منیجمنٹ میں تبدیلیوں کا امکان ہے۔ پاکستان کرکٹ بورڈ نے ہوم سیزن کے اختتام پر ٹیم کی کارکردگی کا تفصیلی جائزہ لینے کا فیصلہ کیا ہے۔
میڈیا رپورٹس میں دعویٰ کیا جا رہا ہے کہ بورڈ تینوں فارمیٹس کے لیے الگ الگ کپتان بنانا چاہتا ہے۔ اس طرح بورڈ بابر اعظم کو صرف ایک فارمیٹ کا کپتان رکھنے پر غور کر رہا ہے۔
یہ بھی کہا جا رہا ہے کہ نجم سیٹھی کا شان مسعود کو ون ڈے ٹیم کا نائب کپتان بنانے کا فیصلہ بھی اسی سلسلے کی ایک کڑی ہے۔ پاکستان سپر لیگ 8 کے بعد تینوں فارمیٹ میں قیادت کا فیصلہ کیا جائے گا۔
یاد رہے کہ اس وقت تینوں فارمیٹ میں پاکستان کرکٹ ٹیم کی قیادت بابر اعظم کر رہے ہیں۔ گزشتہ سال مارچ میں آسٹریلیا اور پاکستان کے درمیان 3 ٹیسٹ میچوں کی سیریز میں قومی ٹیم کو ایک صفر سے شکست ہوئی تھی۔
اس کے بعد حال ہی میں انگلینڈ نے بھی پاکستان کو 3 ٹیسٹ میچوں کی سیریز میں کلین سوئپ شکست دی تھی۔
ٹیم منیجمنٹ کی بات کی جائے تو ہیڈ کوچ ثقلین مشتاق اور بولنگ کوچ شان ٹیٹ کے معاہدے کی مدت بھی فروری میں مکمل ہوجائے گی۔ ٹیم کی کارکردگی کو مدنظر رکھتے ہوئے ممکنہ طور پر ٹیم منیجمنٹ میں بھی تبدیلیاں متوقع ہیں۔
- Featured Thumbs
- https://www.siasat.pk/data/files/s3/6babarcapitancy.jpg
