موجودہ صورتحال میں وقت پر پاسپورٹ کا اجراء کرنا مشکل ہے: ڈائریکٹوریٹ جنرل امیگریشن اینڈ پاسپورٹ
ڈائریکٹوریٹ جنرل امیگریشن اینڈ پاسپورٹ کی طرف سے پاسپورٹ جاری کرنے میں احتیاط اور جانچ پڑتال کا عمل بڑھاتے ہوئے عوام کے لیے نئی ہدایات جاری کر دی ہیں۔
ذرائع کے مطابق ڈائریکٹوریٹ جنرل امیگریشن اینڈ پاسپورٹ کی طرف سے پاسپورٹ جاری کرنے میں احتیاط برتنے اور جانچ پڑتال کا نظام بہتر بنانے کے لیے پاسپورٹ جاری کرنے کی مدت میں اضافہ کر دیا ہے۔ آئندہ سے محکمہ شہریوں کو نارمل پاسپورٹ مکمل جانچ پڑتال کے بعد 21 دنوں میں جاری کرے گا۔
ڈائریکٹوریٹ جنرل امیگریشن اینڈ پاسپورٹ کے مطابق چند شرپسند عناصر کی طرف سے سفری دستاویزات کے غیرقانونی استعمال کیے جانے کا معاملہ سامنے آنے کے بعد موجودہ صورتحال میں وقت پر پاسپورٹ کا اجراء کرنا مشکل ہے۔ آئندہ سے شہریوں کو نارمل پاسپورٹ 21 دنوں جبکہ ارجنٹ پاسپورٹ 5 دنوں میں جاری کیا جائے گا جبکہ فاسٹ ٹریک پاسپورٹ 2 دفتری دنوں کے اندر جاری کیا جائے گا۔
محکمہ پاسپورٹ کی طرف سے عوام سے اپیل کی گئی ہے کہ وہ موجودہ صورتحال میں محکمے کے ساتھ تعاون کریںاور اگر کسی کو مشکلات کا سامنا کرنا پڑے تو سٹیزن پورٹل پر شکایت درج کروائے۔ پاسپورٹ آفسز میں صبح 8 بجے سے دوپہر 1 بجے تک جبکہ جمعۃ المبارک کے روز صبح 8 سے دوپہر 12 بجےپاسپورٹ کے لیے درخواستیں جمع کروائی جا سکتی ہیں۔
یاد رہے کہ چند دن پہلے محکمہ پاسپورٹ کی طرف سے اعلان کیا گیا تھا کہ چند ناگزیر وجوہات کے باعث 100 صفحوں پر مشتمل پاسپورٹ جاری کرنے کا سلسلہ عارضی طور پر منقطع کر رہے ہیں اس لیے شہری 36 یا 72 صفحات پر مشتمل پاسپورٹ کے لیے ہی درخواستیں جمع کروائیں۔
دریں اثنا نگران وزیر داخلہ سرفراز بگتی نے ایپکس کمیٹی اجلاس کے بعد وفاقی دارالحکومت اسلام آباد میں پریس کانفرنس کرتے ہوئے پاکستان میں غیرقانونی طور پر مقیم غیرملکی شہریوں کو یکم نومبر تک اپنے ملک واپس جانے کی ڈیڈلائن دے دی ہے۔ پاکستان میں غیرقانونی رہائش پذیر شہریوں کے اپنے وطن نہ جانے کی صورت میں ایسے شہریوں کو ڈی پورٹ کرنے کا بھی اعلان کر دیا۔
