جوڈیشل مجسٹریٹ نے کرپشن واختیارات سے تجاوز کے کیس میں پہلے سے محفوظ فیصلہ سناتے ہوئے مقدمہ خارج کر دیا:ذرائع
جوڈیشل مجسٹریٹ ضلع کچہری غلام مرتضیٰ ورک نے اینٹی کرپشن کی طرف سے سابق وزیراعلیٰ پنجاب چودھری پرویز الٰہی کے پرنسپل سیکرٹری محمد خان بھٹی کے خلاف بنائے گئے کرپشن واختیارات سے تجاوز کے مقدمہ کا فیصلہ سنا دیا ہے۔
اینٹی کرپشن کی طرف سے محمد خان بھٹی کو گرفتاری کے بعد جوڈیشل مجسٹریٹ کی عدالت میں پیش کیا گیا جہاں محمد خان بھٹی کی طرف سے لاہوربار کے صدررانا انتظار ایڈووکیٹ پیش ہوئے۔
ذرائع کے مطابق اینٹی کرپشن پنجاب کی طرف سے ملزم محمد خان بھٹی کے جسمانی ریمانڈ کی استدعا کو مسترد کرتے ہوئے جوڈیشل مجسٹریٹ نے کرپشن واختیارات سے تجاوز کے کیس میں پہلے سے محفوظ فیصلہ سناتے ہوئے مقدمہ خارج کر دیا۔ فاضل عدالت کی طرف سے محمد خان بھٹی کو 14 روزہ جوڈیشل ریمانڈ پر جیل بھجوا دیا گیا ہے۔
ایف آئی اے کے منی لانڈرنگ کیس میں محمد خان بھٹی کو تفتیش کیلئے جسمانی ریمانڈ کی استدعا کی گئی۔ ملزم محمد خان بھٹی کے وکیل نے مخالفت کرتے ہوئے مزید جسمانی ریمانڈ کو بلاجواز قرار دے دیا۔ ایف آئی اے نے محمد خان بھٹی پر اینٹی منی لانڈرنگ ایکٹ کے تحت مقدمہ درج کیا تھا۔
محمد خان بھٹی کے خلاف مقدمہ خارج ہونے کے بعد کارکنوں نے عدالت کی باہر شدید نعرے بازی کرتے رہے۔ سابق رکن پنجاب اسمبلی نے سماجی رابطوں کی ویب سائٹ ٹویٹر پر اپنے پیغام میں لکھا کہ: الحمد للہ ! سیکریٹری پنجاب اسمبلی محمد خان بھٹی کے خلاف اینٹی کرپشن پنجاب کی جانب سے کل درج کیا جانے والا مقدمہ خارج کر دیا گیا ہے۔
یاد رہے کہ سابق وزیراعلیٰ پنجاب کے پرنسپل سیکرٹری محمد خان بھٹی کو آمدن سے زائد اثاثہ جات بنانے کے الزام میں پہلے اینٹی کرپشن حکام نے کوئٹہ سے گرفتار کیا تھا جبکہ ضمانت سے پہلے ہی ایف آئی اے لاہور نے عدالت سے گرفتار کر کے 3 روزہ جسمانی ریمانڈ منظور کروا لیا تھا۔
