سابق ترجمان وزارت خزانہ اور رہنما تحریک انصاف مزمل اسلم نے وفاقی وزیر خزانہ اسحاق ڈار کی پریس کانفرنس پر ردعمل دیتے ہوئے کہا ہے کہ ایسا لگتا ہے اسحاق ڈار صاحب کا سافٹ ویئر اپ ڈیٹ ہوچکا ہے۔
تفصیلات کے مطابق تحریک انصاف کے دور حکومت میں ترجمان وزارت خزانہ رہنے والے مزمل اسلم نے اسحا ق ڈار کی پریس کانفرنس پر ردعمل دیتے ہوئے اپنا ایک ویڈیو بیان جاری کیا اور کہا کہ ڈالر کی قدر 220، 218 کا ہوجانا کسی کام کا نہیں ہے اگر لوگوں کو کاروبار کرنےکیلئے ڈالر نا ملیں۔
انہوں نے کہا کہ ابھی ابھی وزیر خزانہ نے یہ بڑا اعلان کیا ہے کہ 50 ہزار ڈالر تک جن لوگوں کی ایل سیز ہوں گی انہیں بلا تفریق ڈالر مہیا کردیئے جائیں گے،آج کے دور میں 50 ہزار ڈالر کا ایک کنٹینر بھی نہیں آتا، ڈار صاحب نے یہ 50 ہزار ڈالر کی ایل سی کو چھوٹ دینے سے پتا نہیں کس پر احسان کیا ہے، اور پتا نہیں اس سے ملک میں کتنے کارخانے چل جائیں گے، یہ تو مجھے سمجھ نہیں آرہی۔
مزمل اسلم نے مزید کہا کہ موڈیز کی ریٹنگ کےمعاملےپر اسحاق ڈار صاحب کا یہ بیان کہ یہ ریٹنگ میرے عہدے سنبھالنے سے پہلے کی ہے ، درحقیقت خود کو بچانے کی ایک کوشش ہے۔
بین الاقوامی سطح پر پاکستانی بانڈ ز کی قدر میں اضافےسے متعلق اسحاق ڈار صاحب کےبیان پر مزمل اسلم کا کہنا تھا کہ یہ ایک اچھی بات ہے، یہ کانفیڈنس دینا چاہیے، مگر ڈار صاحب یہ ضرور بتائیں کہ وہ کہاں سے اس کی رقم ادا کریں گے،5 دسمبر کو آپ کو بانڈز کی مد میں سود کے علاوہ 1 ارب ڈالر کی رقم ادا کرنی ہے، ڈار صاحب اس کی تفصیل بھی دیدیں کہ وہ یہ کیسے ادا کریں گے۔
آئی ایم ایف کے ساتھ معاہدے کی خلاف ورزی اور پیٹرولیم مصنوعات کی قیمتوں میں کمی سے متعلق بیان پر مزمل اسلم نے کہا کہ تیاری پکڑ لیں اب ملک میں بجلی گیس اور پیٹرول کی قیمت بڑھے گی جس سے ڈار صاحب کی کارکردگی سب کے سامنے آجائے گی۔
مزمل اسلم کے ویڈیو بیان کو شیئر کرتےہوئے سابق وزیر خزانہ شوکت ترین نے بھی اسحا ق ڈار کی پریس کانفرنس پر ردعمل دیا اور کہا کہ ڈار صاحب کو اپنی بات کو سچ ثابت کرنے کے لیے مارکیٹ کو بتانا ہو گا کہ اس مالی سال میں ڈالر کا اخراج کیا ہو گااور وہ اسے کیسے مینج کریں گے،اس وضاحت سےہی مالیاتی مارکیٹس میں استحکام آسکے گا۔