پاکستان میں ایک ایسی شادی شدہ خاتون بھی رہتی ہیں جو گزشتہ 16 سالوں سے ہر ہفتے باقاعدگی سے نہ صرف دلہن کی طرح میک اپ کرتی ہیں بلکہ عروسی لباس بھی پہنتی ہیں اور پورا دن تیار ہوکر گزارتی ہیں۔
خبررساں ادارے کی رپورٹ کے مطابق لاہور کی رہائشی42 سالہ حرا گزشتہ 16 سالوں سے ہر روز جمعہ کے روز دلہن بنتی ہے، برائڈل میک اپ کرتی ہے، ہاتھوں پیروں پر مہندی لگاتی ہے، شادی کے زیورات اور لباس پہن کر پورا جمعے کا دن گزارتی ہے،اس عادت کی وجہ سے حرا " جمعہ کی دلہن " کے نام سے مشہور بھی ہوگئی ہے۔
حرا ذیشان سے جب اس عادت سے متعلق سوال کیا گیا تو انہوں نے اس کے پیچھے چھپا راز بتاتے ہوئے کہا کہ 16 سال قبل میری ماں کی طبیعت شدید خراب ہوئی اور انہیں ہسپتال منتقل کردیا گیا، ہسپتال میں ایک شخص نے میری ماں کو خون دیا جس پر میری ماں نے اس شخص سے میری شادی کی خواہش کا اظہار کیا اور کہا کہ میں موت سے پہلے بیٹی کی شادی کروانا چاہتی ہوں۔
حرا نے کہا کہ میں نے اپنی ماں کی خوشی کیلئے رضامندی دی ، میری شادی ہوگئی اور میں ہسپتال سے ہی بنا تیار ہوئے رکشے میں رخصت ہوگئی، اپنی شادی جیسے اہم دن میں دلہن نا بننا میرے لیے سخت مایوسی کا سبب بنا، شادی کے کچھ دن بعد میری والدہ کا انتقال ہوگیا اور میری مایوسی شدید ہوگئی۔
انہوں نےکہا اسی دوران لاہور میں ایک دھماکہ ہوا تھا جس کی آواز سے میرا ذہن شدید متاثر ہوا اور میں ڈپریشن کی مریض بن گئی، ڈاکٹرز نے مجھے خوش اور مصروف رکھنے کا مشورہ دیا، میرے شوہر اس وقت پاکستان میں تھے میں ان کیلئے ہر جمعہ کو تیار ہونے لگی اور دلہن کی طرح سجنے سنورنے لگی ، تب سے یہ معمول آج تک قائم ہے اور اب میری عادت بن چکا ہے۔
- Featured Thumbs
- https://www.siasat.pk/data/files/s3/hira-zeeshan1131.jpg
