لاہور کے علاقے لیاقت آباد تھانے کی حدود میں واقعہ مدرسے کے استاد نے چھٹی کرنے والے شاگرد کو مار مار کر درگت بنا ڈالی۔
ترجمان پنجاب پولیس کے مطابق مدرسے کے معلم نے چھٹی کرنے کی سزا کے طور پر 10 سالہ بچے کو بیہمانہ تشدد کا نشانہ بنا ڈالا اور مار مار کر اس کی درگت بنا ڈالی۔
پولیس کا کہنا ہے کہ ملزم کی شناخت طاہر کے نام سے ہوئی ہے جس کے خلاف بچوں پر جسمانی تشدد کی دفعات کے تحت مقدمہ درج کر کے گرفتار کر لیا گیا ہے۔
ترجمان نے بتایا کہ متاثرہ بچے کی شناخت 10 سالہ طیب کے نام سے ہوئی ہے۔ جس کے جسم کے مختلف اعضا اور کمر پر زخموں کے نشان اور بازوؤں ٹانگوں پر گہرے نیل کے نشانات ہیں۔ بچہ پنڈی اسٹاپ پر قائم نجی مدرسے میں پڑھنے جاتا تھا۔
ایس پی ماڈل ٹاؤن ڈاکٹر عمارہ شیرازی نے میڈیا کو دی گئیں تفصیلات میں بتایا کہ ملزم کے خلاف مقدمہ درج کر کے اسے انوسٹی گیشن ونگ کے حوالے کر دیا گیا ہے۔ بچوں پر اس طرح ظلم و جبر کرنے والے کسی طور بھی رعایت کے مستحق نہیں ہیں۔
