قومی کرکٹرز سے سندھ میں ہائی وے پر رشوت لینے والے سندھ پولیس کے 4 پولیس اہلکاروں کو گرفتار کرلیا گیا ہے، کرکٹرز نے رشوت لینے والے پولیس اہلکاروں کے خلاف سوشل میڈیا پرآواز اٹھائی تھی۔
تفصیلات کے مطابق قومی کرکٹر صہیب مقصود اور عامر یامین سے شہید بینظیر آباد میں سکرنڈ تھانے کی حدود میں مین سپر ہائی وے پر رشوت لینے والے 4 پولیس اہلکار کو گرفتار کرلیا گیا ہے جبکہ ایس ایچ اوسکرنڈ تھانہ اور منشی کو بھی غفلت و لاپرواہی کا مرتکب قرار دیتے ہوئے معطل کردیا گیا ہے۔
خیال رہے کہ کراچی سے ملتان جاتےہوئےپولیس کی رشوت ستانی کا نشانہ بننے والے قومی کرکٹرز نے سوشل میڈیا پر جاری پیغام میں بتایا تھا کہ سندھ پولیس اس قدر کرپٹ ہے کہ ہر50 کلومیٹر پر آپ کو روک کر پیسے مانگتی ہے، ہم سے پولیس اہلکاروں نے 8 ہزار کی رشوت لی اور پھر ہمیں جانے دیا۔
معاملہ سوشل میڈیا پر اٹھائے جانے کے بعد آئی جی سندھ رفعت مختیار نے واقعہ کا نوٹس لیتے ہوئے ڈی آئی جی شہید بینظیر آباد پرویز چانڈیو کو تحقیقات کا حکم دیتے ہوئے ملوث پولیس اہلکاروں کے خلاف فوری کارروائی کی ہدایات دی جس پر ڈی آئی جی شہید بینظیر آبادنے ملوث پولیس اہلکاروں کو گرفتار کرواکے ایف آئی آر درج کروادی اور رپورٹ مرتب کرکے آئی جی سندھ کو ارسال کردی ہے۔
- Featured Thumbs
- https://www.siasat.pk/data/files/s3/5سینگلاکاھھساارعست.png
