فیصل آباد میں شادی سے انکار پر لڑکی کو اغوا کےبعد تذلیل کرنے اور تشدد کا نشانہ بنانے والے 6 ملزمان گرفتار ہوگئے ہیں۔
تفصیلات کے مطابق فیصل آباد کے بزنس مین اور بیسٹ ایکسپورٹ فیصل آباد کےمالک شیخ دانش نے میڈیکل کالج کی طالبہ خدیجہ نامی لڑکی کو شادی کی پیشکش کی ، خدیجہ نے شادی سے انکار کردیا جس پر پر شیخ دانش نے اپنے ساتھیوں کےساتھ مل کر یونیورسٹی ٹاؤن سے خدیجہ اور اس کے بھائی حسن کو اغوا کرلیا۔
شیخ دانش سمیت ملزمان خدیجہ اور اس کے بھائی کو اغوا کرکے اپنے گھرلائے جہاں شیخ دانش نے خدیجہ کو زیادتی کا نشانہ بنانے کی کوشش کی، شیخ دانش اور اس کی بیٹی انا شیخ نے اپنے ساتھیوں کے ساتھ مل کر حسن کے سامنے اس کی بہن پر تشدد کی، بال کاٹے اور بھویں مونڈ دیں۔
ملزمان نے اسی پر بس نہیں کی بلکہ خدیجہ پر تشدد کی ویڈیو بھی بنائیں اور ان ویڈیو ز کو سوشل میڈیا پر وائرل کردیا، بعدازاں پولیس نے کارروائی کرتے ہوئے 6 ملزمان کو گرفتار کرلیا۔
پنجاب پولیس کےآفیشل ٹویٹر ہینڈل سے ملزمان کی لاک اپ میں لی گئی تصویر بھی شیئر کی گئی اور کہا گیا کہ فیصل آباد پولیس نے خاتون پر تشدد اور تذلیل کرنے والے چھ ملزمان کو گرفتار کر لیا ہے۔سی پی او فیصل آباد کی تشکیل کردہ خصوصی ٹیم نے ملزمان کو جدید ٹیکنالوجی کی مدد سے گرفتار کیا ۔
