عمران خان کی گرفتاری پر ردعمل دیتے ہوئے مریم نواز نے کہا کہ فتنہ کی گرفتاری کے بعد پورے پاکستان میں کہیں بھی عوام باہر نہیں نکلی۔ صرف وہ تربیت یافتہ بلوائی باہر آئے ہیں جنہیں پچھلے کئی ماہ سے زمان پارک میں اس کی ٹریننگ دی جارہی تھی۔
مریم نواز کا مزید کہنا تھا کہ آج سامنے آنے والی آڈیوز سے بھی یہ بات ثابت ہوگئی ہے کہ اس تخریب کاری کا منصوبہ عمران خان نے خود بنایا ہوا تھا اور وہ تنصیبات مارک کی ہوئی تھیں جہاں اسکی گرفتاری کی صورت میں حملہ کیا جانا تھا۔
انہوں نے کہا کہ عوام نے بھی تحریکِ انصاف کے ان دہشتگردوں کو اپنی آنکھوں سے دیکھ لیا ہے اور کسی احتجاج کا حصہ بننے سے انکار کردیا ہے۔
مریم نواز کا کہنا تھا کہ یہ عمران خان کی تخریبی سیاست کے منہ پر بہت بڑا طمانچہ ہے۔ حکومت کو ان شرپسندوں سے کسی قسم کی رعایت نہیں برتنی چاہیے۔
مریم نواز کو جواب دیتے ہوئے فوادچوہدری نے کہا کہ پاکستان کے عوام کو بلوائی کہنا عوام کی توہین ہے، آپ نے زندگی میں کبھی الیکشن نہیں لڑا عوام میں مقبولیت کیا ہوتی ہے آپ کو اندازہ نہیں ہو سکتا ۔
انہوں نے مزید کہا کہ پورا پاکستان اس جابر اور فاسق حکومت کے خلاف سراپا احتجاج ہے انشاللہ ظلم کا یہ سورج ڈوبے گا اور عوام کی فتح ہو گی
فوادچوہدری نے جواب دیتے ہوئے مزید کہا کہ یہی وجہ ہے آپ نے خصوصی طیارہ تیار رکھا ہے جس پر فوراً فرار ہو سکیں