پاکستان کرکٹ بورڈ (پی سی بی) نے سابق چیئرمین اور موجودہ کمنٹیٹر رمیز راجہ کی جانب سے قومی ٹیم کے کپتان شان مسعود پر کیے گئے طنزیہ سوالات کا سخت نوٹس لیا ہے۔ یہ واقعہ حالیہ میچ کے بعد پوسٹ میچ کانفرنس میں پیش آیا، جہاں رمیز نے شان مسعود سے پوچھا کہ "چھ مسلسل شکستوں کا ریکارڈ کیسے بنایا؟"
یہ جملہ شان مسعود کے لیے ناپسندیدہ لمحہ ثابت ہوا، خصوصاً جب کہ ٹیم نے حالیہ میچ میں کامیابی حاصل کی تھی۔ رمیز راجہ کا انداز بیان اس قدر تنقیدی رہا کہ اس نے پی سی بی کے اعلیٰ حکام کو بھی مداخلت پر مجبور کر دیا۔
ذرائع کے مطابق، پی سی بی اس واقعے کو سنجیدگی سے لیتے ہوئے رمیز راجہ کو آئندہ سیریز کے کمینٹری پینل سے باہر رکھنے پر غور کر رہا ہے۔ تاہم، براڈکاسٹرز کی جانب سے رمیز کو کمنٹری کے لیے ہائیر کیے جانے کے باعث پی سی بی کو براہ راست کارروائی کرنے میں مشکلات کا سامنا ہے۔
شان مسعود نے بھی رمیز کے طنزیہ سوالات پر ناپسندیدگی کا اظہار کیا، جس کے بعد کرکٹ حلقوں میں یہ بحث چھڑ گئی کہ سابق کرکٹرز کو اپنے تبصروں میں زیادہ ذمہ داری کا مظاہرہ کرنا چاہیے۔
پی سی بی کے ذرائع کا کہنا ہے کہ ادارہ ایسے معاملات کو سنجیدگی سے لے رہا ہے اور مستقبل میں اس نوعیت کے واقعات سے بچنے کے لیے ضروری اقدامات کرنے کا ارادہ رکھتا ہے۔
رمیز کے سوالات پر شائقین کا ردعمل فوری اور سخت تھا۔ بہت سے لوگوں نے کہا کہ شان مسعود جیسے کھلاڑیوں کی حوصلہ افزائی کرنی چاہیے، نہ کہ ان کی کامیابیوں کو کم اہمیت دی جائے۔ ٹویٹر پر کرکٹ شائقین نے رمیز راجہ پر تنقید کرتے ہوئے کہا کہ ان کے سوالات مناسب نہیں تھے اور شان مسعود جیسے کھلاڑیوں کے اعتماد کو متاثر کر سکتے ہیں۔ بعض کرکٹ مبصرین نے بھی رمیز کے انداز کو غیر پیشہ ورانہ قرار دیا۔
- Featured Thumbs
- https://www.siasat.pk/data/files/s3/9ramrajskshanmasoodkjsjd.png
