ورلڈ کپ 2023 کے حوالے سے ایک اسپورٹس چینل کی خصوصی نشریات میں عمران خان کا نام لینے سےجان بوجھ کر گریز کیا گیا جس پر وسیم اکرم نے طنزیہ انداز میں مسکرا کر مایوسی کا اظہار کیا۔
تفصیلات کے مطابق نجی خبررساں ادارے"اے آروائی" نیٹ ورک کے اسپورٹس چینل"اے سپورٹس" پر ورلڈ کپ 2023 کے حوالے سے 'دی پویلین' کے نام سے خصوصی نشریات منعقد کی جارہی ہے جس میں سینئر میزبان اور گلوکار فخرعالم میزبانی کی فرائض سرانجام دے رہے ہیں ۔
پروگرام میں ایک حصہ کرکٹ شائقین کی جانب سے ماہرین سے پوچھے گئے سوالات پر مبنی ہے جس میں سابق لیجنڈری کرکٹرز ان سوالوں کے جواب دیتے ہیں، ایسے ہی ایک سیگمنٹ میں میزبان فخرعالم نے شائقین کے سوالات پوچھتے ہوئے وسیم اکرم اور معین خان سے پوچھے گئے ایک سوال کو پڑھنا شروع کیا جو 1992 کے ورلڈ کی فاتح ٹیم کے کپتان عمران خان سے متعلق تھا۔
تاہم سوال میں عمران خان کا نام لینےکے بجائے انہیں "قاسم کے ابو" کے حوالے سے پکارا گیا ، فخر عالم نے پورا سوال پڑھنے کے بعد اس کو سمجھنے میں چند لمحے لگائے اور جیسے ہی انہیں سوال سمجھ آیا تو انہوں نے کہا کہ" میرے خیال میں ہمیں آگے بڑھنا چاہیے، میرا نہیں خیال کہ اس پر ۔۔۔"
فخر عالم کے ساتھ بیٹھے سابق فاسٹ باؤلر اور 1992 کی فاتح ٹیم کا حصہ رہنے والے وسیم اکرم نےاس حرکت کو محسوس کیا اور کیمرے کی جانب دیکھتے ہوئے طنزیہ انداز میں مسکراتے ہوئے نفی میں سر ہلادیا۔
پاکستان تحریک انصاف کے آفیشل ٹویٹر ہینڈل سے اس واقعہ کی ویڈیو کو شیئر کرتےہوئے پروگرام میں شریک تمام افراد کو مخاطب کرتےہوئے کہا کہ اس واقعہ کی وضاحت دیں، آپ نے دنیا بھر میں پھیلے کروڑوں کرکٹ شائقین کے جذبات کو مجروح کیا ہے۔
اس واقعہ کی ویڈیو پر سوشل میڈیا صارفین، کرکٹ شائقین نے بھی شدید مایوسی کا اظہار کیا اور پروگرام میں بیٹھے لوگوں اور چینل انتظامیہ کو آڑے ہاتھوں لیا۔
جبران الیاس نے اے آروائی نیٹ ورک کے مالک سلمان اقبال، سمیت پروگرام کے میزبان اور سابق کرکٹرز کو مخاطب کرتےہوئے کہا کہ یہ اس واقعہ سے پہلے تک ایک اچھا پروگرام تھا، یہ سخت ناانصافی اور اپنے ہیروز کی حوصلہ شکنی ہے، آپ کرکٹ شائقین کے جذبات کو کیوں مجروح کررہے ہیں؟
ہارون نامی ایک صارف نے سعید اجمل کی جانب سے ایک لائی ٹی وی شو میں عمران خان کا نام لینے کی ویڈیو شیئر کرتے ہوئے کہا کہ وسیم اکرم جنہیں عمران خان ٹیم میں لائے تھے ،سے زیادہ جرات کو مظاہرہ تو سعید اجمل نے ایک ٹی وی شو کے دوران کیا تھا، وسیم اکرم صاحب آپ کو شرم آنی چاہیے۔
رضوان علی شاہ نے کہا کہ ایک ورلڈ کپ کی ٹرانسمیشن کے دوران آپ عمران خان کا ذکر نہیں کرسکتے ،جنہوں نے ہمیں اکلوتا ورلڈ کپ جتوایا ہے۔
شعیب نے لکھا کہ ان لوگوں کےکیریئرز عمران خان کی وجہ سے بنے ہیں، اس مشکل وقت میں بجائے اپنے کپتان کے ساتھ اظہار یکجہتی کے یہ لوگ ریاست کی لائن کے پیچھے چل رہے ہیں،شرمناک ہے۔
ایک صارف نے لکھا کہ ایک کرکٹ پروگرام میں پاکستان کے ورلڈ کپ وننگ ٹیم کے کپتان عمران خان ذکر نہیں ہوسکتا ، یہ کتنی پستی کی بات ہے، تاہم ہمیں وسیم اکرم ، معین خان اور فخر عالم سے پوچھنا چاہیے کہ یہ سوال نظر انداز کیوں کیا گیا؟
ایک دوسرے صارف نے فخر عالم اور دیگر کو مخاطب کرتے ہوئے کہا کہ کیا آپ کو اندازہ ہے کہ آپ نے اس ملک کے اب تک کے بہترین کرکٹر سے متعلق سوال کو نظر انداز کیا، وسیم اکرم اور معین خان بھی اس موقع پر کچھ نا کرسکے۔
- Featured Thumbs
- https://www.siasat.pk/data/files/s3/18waseemmonaiiehkhjhssh.png
