سینئر صحافی مطیع اللہ جان نے سوشل میڈیا پر گردش کرنے والی ایک ویڈیو جسے وفاقی وزیر دفاع خواجہ آصف کی بیٹی سے منسوب کیا جارہا ہے کے معاملے پر پی ٹی آئی کو ذمہ دار ٹھہرادیا ہے،سوشل میڈیا صارفین کا ملا جلا ردعمل۔
تفصیلات کے مطابق سوشل میڈیا پلیٹ فارمز اور واٹس ایپ گروپس میں ایک ویڈیو بہت تیزی سے وائرل ہوئی ہے جس میں ایک نوجوان لڑکی بھارتی گانے پر ڈانس کرتی ہوئی دکھائی دے رہی ہے، ویڈیوز شیئر کرنے والے مبینہ طور پر اس لڑکی کو وفاقی وزیر دفاع خواجہ آصف کی بیٹی سے منسوب کررہے ہیں۔
مطیع اللہ جان نے اس حوالے سے ٹویٹر پر جاری اپنے بیان میں کہا ہے کہ کیا بیرون ملک مقیم پاکستانی خواتین کی نجی زندگیوں کی ویڈیوز سوشل میڈیا پر شیئر کرنا پی ٹی آئی کی نئی پالیسی ہے؟ ایسی ویڈیوز کو بنیاد بنا کر بیرون ملک مقیم پاکستانی خواتین کے کردار پر سوال اٹھانا جائز ہے؟
انہوں نے مزید کہا کہ کیا بیرون ملک مقیم خواتین کی بڑی تعداد پی ٹی آئی کو سپورٹ نہیں کرتی؟ کیا ان خواتین کی ایسی ویڈیوز پر پارٹی خواتین کی خاموشی پی ٹی آئی کی تہمت زدہ مہم کی حمایت یا منافقت نہیں؟
مطیع اللہ جان کی جانب سے اس وائرل ویڈیو کے معاملے کا الزام پی ٹی آئی پر ڈالنے پر سوشل میڈیا صارفین نے بھی سخت نوٹس لیا اور مطیع اللہ جان کی ٹویٹ کو عمران خان سے حسد قرار دیا، دوسری جانب سوشل میڈیا صارفین نے ایسی ویڈیوز وائرل کرنے کے معاملے کی بھی شدید مذمت کی۔
محسن اقبال نامی صارف نے مطیع اللہ جان کو آئینہ دکھاتے ہوئے کہا کہ ٹیریان کے معاملے کو عدالت میں لےجانا ، ثاقب نثار کی آڈیو لیک کرنا، بیرون ملک مقیم پاکستانیوں کے ووٹ کا حق ختم کرنا جائز ہے اور شریف، زرداری خاندانوں کی بیرون ملک اربوں کی جائیدادوں کا پوچھنا ناجائز ہے۔
محسن اقبال نے مطیع اللہ جان کی جانب سے ماضی میں نجی نوعیت کی ٹویٹس کے سکرین شاٹس بھی شیئر کیے اور کہا کہ کسی کی ذاتی کردار کُشی بالکل بھی جائز نہیں لیکن جو لوگ ابھی اخلاقیات کا بھاشن دے رہے ہیں اُن سے سوال ہے کیا موصوف کی طرف سے ایسے بیانات جائز تھے۔
اکرام راعی نے مطیع اللہ جان کو مخاطب کرتے ہوئے کہا کہ بہتر تھا آپ تمام جماعتوں سے یہی سوالات پوچھتے کہ کیا بہنوں بیٹیوں کی نجی زندگی کی ویڈیوز آڈیوز تصاویر سوشل میڈیا پر ڈالنا ان کی پارٹی پالیسی ہے؟
احسن منظور نے اس معاملے کو چیف جسٹس کی ساس کی آڈیو لیک سے جوڑتے ہوئے کہا کہ عمران خان کی فیملی، چیف جسٹس کی ساس ، کیا یہ نجی معاملات نہیں ہیں۔
دوسری جانب کچھ سوشل میڈیا صارفین نے ایسی ویڈیوز کو کسی سے منسوب کرکے سوشل میڈیا پر شیئر کرنے کی مذمت کی ۔
- Featured Thumbs
- https://www.siasat.pk/data/files/s3/3martitiiullahajajajaj.jpg
