سنگ ماہ کی پہلی قسط کے بعد ڈرامے کو شائقین کی جانب سے خوب سراہا گیا، جہاں سوشل میڈیا پر لوگ ڈرامہ کو سراہ رہے ہیں وہیں پر کچھ لوگوں کی جانب سے ڈرامے پر تنقید بھی جاری ہے۔
تفصیلات کے مطابق سنگ ماہ کی پہلی قسط 7 اور 8 جنوری کو سینماؤں میں پیش کیا گیا جبکہ 9 جنوری سےباقاعدہ ٹی وی پر نشر کرنے کا آغاز کیا گیا۔ شائقین کی جانب سے عاطف اسلم کے کردار 'ہلمند' کی تعریف کی گئی جبکہ ڈرامے کی کہانی اور دیگر کرداروں کی بھی خوب پزیرائی ہوئی۔
رابعہ مغنی نامی سوشل میڈیا صارف کا کہنا تھا کہ میں نے ڈرامہ کی پہلی قسط سنیما میں دیکھی اور 2 چیزیں جو میں آپ کو بتانا چاہتی ہوں، ایک یہ کہ عاطف اسلم کے ادا کردہ ہلمند کے سحر میں گرفتار ہونے اور اس سے پیار کرنے کے لئے تیار ہو جائیں، دوسرا دلکش ہونے کے لیے تیار ہو جائیں اور پھر سے پیار ہو جائیں, دوسرا سنگ مہ کی دنیا میں داخل ہونے کے بعد وہاں سے واپسی نہیں ہوسکتی۔
ایک صارف نے عاطف اسلم کی اداکاری کی تعریف کرتے ہوئے کہا کہ کمال اپنے عروج پر، ایسا محسوس ہی نہیں ہوا کہ وہ اداکاری کررہے ہیں، وہ کردار جی رہے ہیں، وہ 'ہلمند' جی رہےہیں، ایک اداکار کو ایسا ہی ہونا چاہیے۔
جہاں ڈرامے نے شائقین کی خوب داد سمیٹی وہیں خیبرپختونخوا سے تعلق رکھنے والے افراد نے ڈرامے کی کہانی اور ڈرامے پر میں پشتونوں کو غلط انداز میں پیش کرنے کا الزام عائد کرتے ہوئے برہمی کا اظہار کیا۔
پشتون افراد نے ’سنگ ماہ’ کی پہلی قسط دیکھنے کے بعد ٹوئٹس کیں اور کہا کہ ڈرامے کے مرد کردار کو منظور پشتین کی طرح کی ٹوپی پہنا کر غلط کام کرتے دکھایا گیا ہے اور ثانیہ سعید کو صوابی کی خواتین کے لباس میں پیش کرکے انہیں بھی نامناسب انداز میں پیش کیا گیا۔
کچھ شائقین کی جانب سے سوال اٹھایا گیا کہ سنگ ماہ میں جو "غگ"(زبردستی شادی) کا رواج دکھایا گیا ہے وہ پختونخوا کے کونسے علاقے کی ترجمانی کر رہا ہے؟ ساتھ ہی دعویٰ کیا کہ وہاں اس قسم کی کوئی رسم نہیں ہے۔
کچھ شائقین نے ڈرامے میں ثانیہ سعید کے کردار کو پہنائی گئی چادر کی تاریخی اہمیت کے حواقلے سے بات کرتے ہوئے کہا کہ انہیں ڈراما دیکھ کر ہی معلوم ہوا کہ سن 1800 میں صوابی والوں کی سکھوں کے ساتھ جنگ میں جو لوگ زخمی ہوئے تھے انہیں خواتین نے اپنے سفید دوپٹوں میں ڈھانپا تھا اور آج تک وہاں کی عورتیں اس خون آلود رنگ کی چادر اوڑھتی ہیں۔
زوہیب آفریدی نامی صارف نے کہا کہ اردو بولنے اور سمجھنے والے یاد رکھیں، یہ تعصبی نفرت انگیز رویہ بنگالیوں کے ساتھ بھی روا رکھا تھا. اس کے بعد بلوچ اور پختون کے ساتھ ہو رہا ہے اور یہ سب بہت برے نتائج لاے گے پختونوں کو آزادی نصیب ہوگی یہ رویے دشمنی پر مبنی ہیں۔
واضح رہے کہ 'سنگ ماہ' 2 کی کہانی پاکستان کے قبائلی علاقہ جات کے خاندان اور وہاں کی رسم و رواج کے گرد گھومتی ہے، ڈرامہ کے ذریعے گلوکار عاطف اسلم چھوٹی سکرین پر اداکاری کا ڈیبیو کر رہے ہیں، ڈرامے میں عاطف اسلم بااثر روایتی قبائلی سردار کے روپ میں دکھائی دیں گے، سنگ ماہ کی دیگر کاسٹ میں نعمان اعجاز، ان کے بیٹے زاویار اعجاز، ہانیہ عامر، کبریٰ خان اور ثانیہ سعید سمیت سامیعہ ممتاز اور میکال ذوالفقار بھی شامل ہیں،ڈرامے کی ہدایات سیفی حسن دے رہے ہیں۔
- Featured Thumbs
- https://www.siasat.pk/data/files/s3/9sangmahtanqeed.jpg
