سعودی عرب نے دل، جگر ، گردے اور دیگر پیچیدہ امراض میں مبتلا افراد کے حج کرنے پر پابندی عائد کردی ہے۔
تفصیلات کے مطابق سعودی وزارت حج و عمرہ کی جانب سے حج 2025 سے متعلق ہیلتھ ایڈوائزری جاری کردی گئی ہے، پاکستان کی وزارت مذہبی امور کو موصول ہونے والی ہیلتھ ایڈوائزری میں کہا گیا ہے کہ پیچیدہ امراض کا شکار افراد کو سفر حج پرجانے کی اجازت نہیں دی جائے گی۔
اس حوالے سے وزارت مذہبی امور کے ترجمان نے کہا ہے کہ سعودی عرب نے اپنی ہیلتھ ایڈوائزری میں کہا ہے کہ صرف تندرست اور صحت مند عازمین کو ہی سفر حج پر جانے کی اجازت دی جائے گی، موسم کی شدت کو دیکھتے ہوئے دل، جگر، گردہ، پھیپھڑے اور کینسر کے مریض حج پر نہیں جاسکیں گے۔
ترجمان وزارت مذہبی امور نے بتایا کہ سعودی عرب نے متعدی امراض جن میں ٹی بی، تپ دق، کالی کھانسی جیسی بیماریوں کے حامل افراد کو بھی سفر حج پر جانے سے روک دیا ہے، اس کے ساتھ ساتھ حاملہ خواتین اور 12 سال سے کم عمر بچے بھی آئندہ سال حج کیلئے نہیں جاسکیں گے۔
سعودی عرب نے حج 2025 کی ادائیگی کے خواہش مند عازمین کیلئے کورونا، پولیو، موسمی انفلوئنزا اور گردن توڑ بخار کی ویکسین لازمی قرار دیدی ہے۔
- Featured Thumbs
- https://www.siasat.pk/data/files/s3/saudi1h112h1.jpg
