جماعت اسلامی کے سینیٹر مشتاق احمد خان نے خدشہ ظاہر کیا ہے کہ ستمبر کے مہینے میں جو بل آئیں گے اس میں بجلی کی قیمت 90روپے فی یونٹ تک ہوگی۔
جیو نیوز کے پروگرام کیپٹل ٹالک میں بجلی کی قیمتوں سے متعلق سوال کا جواب دیتے ہوئے سینیٹر مشتاق احمد خان نے کہا کہ میڈیا میں خبر ہے کہ نگراں حکومت نے کہا ہے کہ ستمبر میں آنے والے بل میں فی یونٹ بجلی کی قیمت 90روپے عائد کی جائے گی، میں آپ کے توسط سے عوام کو کہنا چاہتا ہوں کہ ڈرنے کیلئے تیار ہوجائیں۔
مشتاق احمد خان نے کہا کہ انہوں نے خود کہا ہے کہ اس مہینے کے بلوں سے بھی ڈبل بل ستمبر کے مہینے میں آئیں گے۔
اس سے قبل اپنے ایک ٹوئٹر پیغام میں انہوں نے کہا کہ خدا کیلئے بس کرلو!ایک طرف نگران وزیراعظم کا بجلی کی قیمتوں میں کمی کیلئے میٹنگز/ہدایات کاڈرامہ اور دوسری طرف اسی حکومت کےواپڈا کے یہ اعلانات۔یہ وہ بارودی سرنگیں ہیں جو گذشتہ حکومتوں نے بچھائے ہیں اور موجودہ نگران حکومتیں اس میں مزید شدت لا رہی ہیں۔
انہوں نے کہا کہ وزارت پانی و بجلی کا یہ اعلان ملک کے 24 کروڑ عوام کے لیے معاشی ڈیتھ وارنٹ ہے، یہ ناقابل قبول ہے، حکمران اور اشرافیہ نے ابھی تک اپنا پروٹوکول اور اخراجات میں ایک روپے کی معمولی سی کمی بھی نہیں کی اور مسلسل سارا بوجھ عوام کے اوپر ڈال رہے ہیں۔ بجلی کے بھاری بھرکم بل اشرافیہ/حکمرانوں کی معاشی دہشتگردی ہے عوام اس کے خلاف اپنے اتحاد کو قائم رکھتے ہوئے آگے بڑھیں۔
- Featured Thumbs
- https://www.siasat.pk/data/files/s3/senatormh1h1121.jpg
