اینٹی کرپشن پنجاب نے بزدار حکومت میں کابینہ کے رکن عبدالحئی دستی کے گھر پر چھاپہ مارا ہے جس میں 12 کروڑ روپے کیش برآمد ہوا ہے۔
تفصیلات کے مطابق ڈی جی اینٹی کرپشن پنجاب سہیل ظفر نے اس حوالے سے تفصیلات بتاتے ہوئے کہا ہے کہ سابق وزیراعلی عثمان بزدار کے مشیر رہنے والے عبدالحئی دستی کے مظفر گڑھ میں واقع گھر پر کارروائی کے دوران12 کروڑ روپے کی ملکی و غیر ملکی کرنسی برآمد ہوئی ہے۔
انہوں نے مزید کہا کہ برآمد شد ہ رقم میں 14 لاکھ درہم بھی شامل ہیں، عبدالحئی دستی نے یہ رقم مختلف منصوبوں میں بطور کمیشن لی ہے، گھر سے نوٹ گننے والی مشین بھی برآمد ہوئی ہے۔
سینئر انویسٹی گیشن صحافی عمر چیمہ نے اس حوالے سے تفصیلات بتاتے ہوئے کہا کہ مبینہ طور پر برآمد شدہ رقم 15کروڑ، 11 لاکھ چھپن ہزار روپے ہے، یہ اینٹی کرپشن کے ریکارڈ کے مطابق اب تک برآمد ہونے والی سب سے بڑی کیش رقم ہے۔
انہوں نے مزید کہا کہ خفیہ اطلاع ملنے پر ڈی جی اینٹی کرپشن پنجاب سہیل ظفر نے ایڈیشنل ڈی جی وقاص حسن کو لاہور سے مظفر گڑھ بھیجا جنہوں نے مجاز عدالت سے وارنٹ حاصل کرنے کے بعد عبدالحئی دستی کے گھر پر چھاپہ مارا، تلاشی کے دوران گھر کی خفیہ تجوریوں سےملکی و غیر ملکی کرنسی برآمد ہوئی۔
