بھارتی جارحیت کے دوران اندرون و بیرون ملک سے سوشل میڈیا پر پاکستان اور اس کے اداروں کے خلاف ہرزہ سرائی اور نفرت انگیز مہم چلانے والوں کے خلاف قانونی کارروائی کا آغاز کر دیا گیا ہے۔
رپورٹس کے مطابق نیشنل سائبر کرائم انویسٹی گیشن ایجنسی نے بھارتی جارحیت کے دوران سوشل میڈیا پر وطن اور ریاستی اداروں کے خلاف ہرزہ سرائی کرنے والے عناصر کے گرد گھیرا تنگ کرتے ہوئے صحافی و یوٹیوبر احمد نورانی سمیت تین افراد کے خلاف مقدمات درج کر لیے ہیں۔
ایجنسی نے پاکستان اور اس کے اداروں کے خلاف نفرت انگیز مہم چلانے والوں کے خلاف کارروائی شروع کی، اور ابتدائی انکوائری کے بعد عادل فاروق راجا، محمد عمر اور احمد نورانی پر پیکا ایکٹ کے تحت علیحدہ علیحدہ مقدمات درج کیے گئے۔
ملزمان پر الزام ہے کہ انہوں نے بھارتی جارحیت کے دوران سوشل میڈیا پر پاکستان اور ریاستی اداروں کے خلاف گمراہ کن پروپیگنڈا کیا اور جھوٹا و اشتعال انگیز مواد شیئر کیا۔
حکام کے مطابق، تینوں افراد کے خلاف مقدمات سرکار کی مدعیت میں درج کیے گئے ہیں، اور مقدمات کے اندراج کے بعد وسیع پیمانے پر تحقیقات کا آغاز کر دیا گیا ہے۔
