بھارتی صحافی کا محمد رضوان سے غلط بیان منسوب کرکے آسٹریلیوی کپتان سے سوال بے سود رہا
بھارتی صحافی کی جانب سے پاکستانی وکٹ کیپر بیٹسمین کے ایک بیان کو تروڑ مروڑ کر پیش کرکے آسٹریلوی کپتان سے سوال کرنا بے سود رہا، آسٹریلوی کپتان نے مطلوبہ جواب نا دے کر بھارتی صحافی کو مایوس کردیا۔
تفصیلات کے مطابق پاکستان اور آسٹریلیا کے جمعرات کو ہونےو الے میچ سے ایک روز قبل آج بنگلورو میں آسٹریلوی کپتان پیٹ کمنز نے پریس کانفرنس کی، اس موقع پر ایک صحافی نے محمد رضوان کے بیان پر غلط بیانی سے کام لیتے ہوئے سوال کیا کہ محمد رضوان نے ایک میچ میں اپنی جیت کو حماس کے نام کیا، کیا کرکٹ میں ایسے بیانات ضروری ہیں؟ کیا آپ اس بیان کو کھیل کو سیاست زدہ کرنے کی کوشش نہیں سمجھتے؟
آسٹریلوی کپتان نے بھارتی صحافی کی خواہش کے مطابق محمد رضوان کے بیان پر زیادہ ردعمل نہیں دیا اور ایک ٹکا سا جواب دیتے ہوئے کہا کہ میرا خیال ہے کہ مجھ تک ادھوری بات پہنچی ہے، مجھے کھلاڑیوں کو دیکھنا اور ان کی شخصیات کو سامنے لانا پسند ہے، تاہم یہ بہت مضبوط خیالات نہیں ہیں۔
خیال رہے کہ ورلڈ کپ 2023 میں پاکستان کی جانب سے سری لنکا کو دی گئی شکست میں وکٹ کیپر بیٹسمین نے اہم کردار ادا کیا تھا جس پر انہیں مین آف دی میچ قرار دیا گیا، میچ کے بعد محمد رضوان نے ٹویٹر پر اپنے اس ایوارڈ کو فلسطین کے مظلوم بہن بھائیوں کے نام کرتے ہوئے یکجہتی کا اظہار کیا تھا۔
محمد رضوان کی جانب سے مظلوم فلسطینیوں کیلئے آواز اٹھانا بھارت کو ایک آنکھ نا بھایا، اس دن کے بعد سے بھارت میں محمد رضوان سمیت پاکستانی کھلاڑیوں کو شدید متعصب رویے اور نامناسب ریمارکس کا سامنا کرنا پڑرہا ہے، آسٹریلوی کپتان سے سوال پوچھنے والے صحافی نے بھی اس تعصب کے باعث مظلوم فلسطینیوں کے نام کیے گئے ایوارڈ کے بیان کو اپنا رنگ دیتے ہوئے کہا کہ محمد رضوان نے جیت حماس کے نام کی۔
- Featured Thumbs
- https://www.siasat.pk/data/files/s3/rizwaan-khan-aa.jpg
